"ქრისტიან-დემოკრატების" ლიდერებმა გიორგობა აზერბაიჯანში, კახის რაიონის მოსახლეობას მიულოცეს. კახისა და ქურმუხის წმინდა გიორგის სახელობის ეკლესიებში ადგილობრივ ქართველებთან ერთად დღესასწაულს აზერბაიჯანელებიც ზეიმობდნენ.
სადღესასწაულო წირვის შემდეგ გიორგი თარგამაძე, ნიკა ლალიაშვილი და ინგა გრიგოლია, სამღვდელოებასთან ერთად, სოფელ ალიბეგლოში წმინდა ნინოს სახელობის ტაძარში მივიდნენ, რომლის რესტავრაცია მალე დასრულდება და კახის წმინდა გიორგის სახელობის ეკლესიასთან ერთად, რეგიონში, მართლმადიდებელი ქრისტიანებისთვის მეორე მოქმედი სალოცავი იქნება.
„ქრისტიან-დემოკრატებმა" მეუფე მელქისედეკს კახის რაიონში რწმენის გაძლიერებისა და სასულიერო-საგანმანათლებლო საქმიანობისთვის მადლობა გადაუხადეს.
"შეუფასებელია ის ღვაწლი, რომელიც კახის რაიონის ქართულ მოსახლეობაში ქართული ენის შენარჩუნებისა და ქრისტიანული რწმენის განმტკიცების საქმეში მეუფე მელქისედეკს და აქ მოღვაწე სხვა სასულიერო პირებს მიუძღვით. დიდი მადლობა მათ და რა თქმა უნდა, მრევლს, ყველა ქართველს... მადლობას ნამდვილად არ იმსახურებს საქართველოს ხელისუფლება, რომელიც მინიმალურ ყურადღებასაც არ აქცევს კახის რაიონში მცხოვრებ ათასობით ქართველს, რასაც ისინი ყველაზე მტკივნეულად განიცდიან" - განაცხადა გიორგი თარგამაძემ.