პარტია "თავისუფალი დემოკრატების" წევრი, ოპოზიციონერი დეპუტატი გიორგი ცაგარეიშვილის შეფასებით, ხელისუფლებამ "სააკაშვილი ერთგული დიპლომატები" მიზანმიმართულად დანიშნა ხელახლა.
ცაგარეიშვილის თქმით, ეჭვს ის გარემოება აჩენს, რომ ხელახლა დანიშნული ელჩების უმრავლესობას უფლებამოსილება 2012-2013 წლებში ეწურებოდა.
"აშკარაა, რომ მომავალი პარლამენტი პოლიტიკურად ბევრად უფრო დაბალანსებული და ჭრელი იქნება. ამის გათვალისწინებით, ხელისუფლების ყველაზე "ერთგულ" ელჩებს, შესაძლოა, ხელმეორედ დანიშვნისას, მომავალ პარლამენტში პრობლემები შეჰქმნოდათ, გადანიშნულ ელჩებს კი უფლებამოსილება 2015 წლამდე გაუგრძელდებათ", - განაცხადა ცაგარეიშვილმა.
შეგახსენებთ, რომ საქართველოს პარლამენტმა რუმინეთის ყოფილი ელჩი ლევან მეტრეველი კანადაში საგანგებო და სრულუფლებიან ელჩად დაამტკიცა, ხოლო დანარჩენი ექვსი ელჩი ხელახლა დანიშნა.
როგორც პარლამენტში განმარტავენ, ელჩების ხელახლა დანიშვნა "დიპლომატიური სამსახურის შესახებ კანონში" შეტანილი ცვლილებების გამო მოხდა, რომლებიც, გარდა ელჩის თანამდებობისა, სხვადასხვა საერთაშორისო ორგანიზაციაში საქართველოს წარმომადგენლებიც იქნებიან.
პარლამენტის გადაწვეტილებით, სალომე სამადაშვილი ბელგიის სამეფოში საქართველოს საგანგებო და სრულუფლებიან ელჩად და ევროკავშირში საქართველოს წარმომადგენლად დარჩება, გრიგოლ მგალობლიშვილი - ნატოში საქართველოს წარმომადგენლად, კონსტანტინე გაბაშვილი - იტალიის რესპუბლიკაში საგანგებო და სრულუფლებიან ელჩად და რომში განლაგებულ გაეროს საერთაშორისო ორგანიზაციებში საქართველოს მუდმივ წარმომადგენლად, ზურაბ ჭიაბერაშვილი - შვეიცარიის კონფერენციაში სრულუფლებიან და საგანგებო ელჩად და ჟენევაში გაეროს განყოფილებებსა და სხვა საერთაშორისო ორგანიზაციებში საქართველოს მუდმივ წარმომადგენლად, მამუკა კუდავა - საფრანგეთის რესპუბლიკაში საგანგებო და სრულუფლებიან ელჩად, იუნესკოში საქართველოს მუდმივ წარმომადგენლად, პაატა გაფრინდაშვილი კი - ავსტრიის რესპუბლიკაში საგანგებო და სრულუფლებიან ელჩად და ევროპის უსაფრთხოებისა და თანამშრომლობის ორგანიზაციასა და ვენაში განლაგებულ საერთაშორისო ორგანიზაციებში საქართველოს მუდმივ წარმომადგენლად.
