საგარეო საქმეთა სამინისტრო რონალდ ასმუსის გარდაცვალებასთან დაკავშირებით მწუხარებას გამოთქვამს.
"ჩვენი ქვეყნის დასავლეთთან ინტეგრაციის გზაზე რონალდ ასმუსი საქართველოს ერთ-ერთი ყველაზე სანდო გზამკვლევი იყო. იგი განასახიერებდა იმ პრინციპებსა და ღირებულებებს, რომლისკენაც საქართველო მიისწრაფვის. მას უყოყმანოდ სჯეროდა, რომ საქართველოს თავისი კუთვნილი ადგილი აქვს ევროატლანტიკური სივრცის დემოკრატიათა თანამეგობრობაში. ქართველი ხალხის მეხსიერებაში წარუშლელი კვალი დატოვა მისმა გამორჩეულმა წიგნმა „პატარა ომი, რომელმაც შესძრა მსოფლიო", რომელიც მისი შორსმჭვრეტელობისა და თავდადების უკვდავ ქრონიკად დარჩება", - ნათქვამია საგარეო უწყების განცხადებაში.
ამასთან, სამინისტროს შეფასებით, "ერთიანი და თავისუფალი ევროპის იდეით განმსჭვალული რონალდ ასმუსი ატლანტიკურ სივრცეში თავისუფლებისა და ლიბერალური ღირებულებების დაუღალავ ენთუზიასტს წარმოადგენდა. იგი ნატოში ცენტრალური და აღმოსავლეთ ევროპის ახალი დემოკრატიების ინტეგრაციის მნიშვნელოვანი არქიტექტორი იყო. მან წარუშლელი დადებითი წვლილი შეიტანა ტრანსატლანტიკური ურთიერთობებისა და ევროპის უსაფრთხოების ისტორიაში".
"საგარეო საქმეთა სამინისტრო უცხადებს გულწრფელ სამძიმარს რონალდ ასმუსის ოჯახსა და მეგობრებს", - აღნიშნულია განცხადებაში.