ყველამ უნდა შეასრულოს აღებული ვალდებულება, ეს იქნება კახი კალაძე თუ სხვა, - ამის შესახებ საპარლამენტო უმრავლესობის ერთ-ერთმა ლიდერმა, იურიდიულ საკითხთა კომიტეტის თავმჯდომარემ პავლე კუბლაშვილმა ფეხბურთელ კახი კალაძის "არსენალ სითის" პროექტის პირობების შესრულების საკითხთან დაკავშირებით განაცხადა.
"თუ აქვს რაიმე ვალდებულება რომელიმე პირს, იქნება ეს კახი კალაძე თუ სხვა პირი, მიუხედავად იმის რა კავშირი აქვს რომელიმე პოლიტიკურ ძალასთან, სხვა ქვეყანასთან, ამას არ აქვს მნიშვნელობა. თუ რაიმე ვალდებულება არსებობს, რომელიც არ შესრულებულა, ხელშეკრულებაში დარწმუნებული ვარ გათვალისწინებული იქნება, რომ ასეთ შემთხვევაში შეიძლება ქონება სახელმწიფოს დაუბრუნდეს", - აღნიშნა კუბლაშვილმა.
მისი შეფასებით, აღნიშნული გადაწყვეტილება იქნება ლოგიკური, რადგან ქონების გადაცემა ხდება პირობით და თუ ეს პირობა არ შესრულდება მოყვება შესაბამის ქმედება.
შეგახსნებთ, რომ ფეხბურთელ კახი კალაძესა და მთავრობას შორის "არსენალ სითის" პროექტთან დაკავშირებით მოლაპარაკებები შეჩერებულია.
დღემდე „კალა კაპიტალს" საპრივატიზაციო დარღვევებისთვის ყოველდღიურად 19 ათასი აშშ დოლარის საურავი ერიცხება.
კახი კალაძისა და მთავრობას შორის უთანხმოება 2008 წლიდან არსებობს. აგვისტოს ომის შემდეგ კალაძე ეკონომიკის სამინისტროსგან პროექტის განხორციელების ვადების გადაწევას მოითხოვდა. თუმცა, ფეხბურთელმა შეთანხმებას ამ დრომდე ვერ მიაღწია.
მთავრობასა და კახი კალაძეს მიერ დაფუძნებულ "კალა კაპიტალს" შორის რამდენიმე წლის წინათ გაფორმებული საპრივატიზაციო ხელშეკრულების თანახმად, კომპანიამ "არსენალის" მთაზე მდებარე მიწის ნაკვეთის ღირებულებიდან (38 მლნ აშშ დოლარი) სახელმწიფო ბიუჯეტის სასარგებლოდ პირველ ეტაპზე 19 მლნ აშშ დოლარი გადაიხადა, დანარჩენი თანხა კი 2012 წლამდე ეტაპობრივად უნდა გადაეხადა. გადახდის გრაფიკის მიხედვით, მენეჯმენტს 2008 წლის 15 სექტემბრამდე 9,490 მლნ. აშშ დოლარი უნდა დაეფარა, რაც არ გადაუხდია.
კომპანიის დამფუძნებელი კახი კალაძე აცხადებდა, რომ "არსენალ სითის" მსგავსი მრავალმილიონიანი ბიუჯეტის პროექტის განხორციელებას გლობალური კრიზისის ფონზე აზრი ეკარგება და ამიტომ კალაძე ვალდებულებების გადავადებას ითხოვდა. ეკონომიკური განვითარების ყოფილი მინისტრი ლაშა ჟვანია კალაძეს პროექტში პარტნიორის შეყვანას სთავაზობდა, წინააღმდეგ შემთხვევაში სახელმწიფოს წინაშე აღებული ვალდებულებების შეუსრულებლობის გამო, მიწის ნაკვეთის ჩამორთმევით ემუქრებოდა.
პროექტის მიხედვით, "არსენალ სითი" მრავალფუნქციური კომპლექსია, რომელიც საცხოვრებელ, საოფისე და რეკრეაციულ ზონებს აერთიანებს. სახელმწიფოსთან აღებული ვალდებულებით, კომპანიამ კომპლექსის ტერიტორიაზე ასევე სამთავრობო ოფისები უნდა ააშენო.