"ვცვლით ვტო-ს ბორჯომზე" - ამ სათაურით აქვეყნებს მასალას გაზეთი იზვესტია და აღნიშნავს, რომ "რუსეთ- საქართველოს საზღვარზე საქონლის მოძრაობას არა ადამიანები, არამედ თანამგზავრები გააკონტროლებენ. ასეთი გადაწყვეტილება იქნა მიღებული ვაჭრობის მსოფლიო ორგანიზაციაში რუსეთის წევრობასთან დაკავშირებით. ხოლო იმისათვის, რომ არსებობდეს კონტროლის საგანი რუსეთის მთავარ სანიტარულ ექიმს გენადო ონიშჩენკოს ქართული ღვინისა და "ბორჯომის" დაასბრუნებლად რუსეთის ბაზარზე ღონისძიებების გატარება დაავალეს".
"სულ ახლახანს ციურიხში რუსულ ქართული საიდუმლო მოლაპარაკებები დასრულდა, ისინი არც ისე სავალალო იყო ვიდრე მათი წინამორბედი მოლაპარაკებები ბერნში", _ წერს გაზეთი "იზვესტია" მოლაპარაკებებში მონაწილე ადამიანებზე დაყრდნობით და აგრძელებს - "შესაძლოა უკვე გადაწყვეტილია მთავარი პრობლემა - ვისი მესაზღვრეები და მებაჟეები იდგებიან აფხაზეთისა და სამხრეთ ოსეთის საზღვრებზე. ეს იქნებიან არა ადამიანები, არამედ რობოტები ანუ ავტომატიზირებული საკონტროლო სისტემა, რომელიც თანამგზავრებზეა მიმაგრებული. ვისი იდეა იყო ეს, ამას უკვე მნიშვნელობა არ აქვს, მთავარი ისაა, რომ თბილისი წინააღმდეგი არ არის. ოფიციალურად კი ორივე მხარის დელეგაციამ პირში წყალი ჩაიგუბა", _ წერს გაზეთი.
"მე ამაზე კომენტარს არ გავაკეთებ", _ განუცხადა "იზვესტიას" მოლაპარაკებებზე რუსული დელეგაციის ხელმძღვანელმა მაქსიმ მედვედკოვმა.
"წარმატებებით შთაგონებულმა რუსულმა მხარემ, რუსეთის მთავარ სანიტარს გენადო ონიშჩენკოს უკვე უბრძანეს ქვეყანაში, თბილისის საამებლად ქართული ღვინოები და "ბორჯომი" დააბრუნოს", _ აცხადებს ალექსეი პორტანსკი ეკონომიკის უმაღლესი სკოლიდან. ონიშჩენკომ განაცხადა: იგი დაიწყებს მოლაპარაკებებს და მხოლოდ ოპოზიციასთან. ექსპერტი ვადიმ დრობიზი კი შიშობს, რომ პროვოკაცია მზადდება.
"ასეთი მოლაპარაკებები რამდენჯერმე დაწყებულა და ყოველთვის რაღაც ხდებოდა. ხან საქართველოში გაურკვეველი რაკეტა მიფრინდებოდა, ხან ჩნდებოდა ინფორმაცია იმის შესახებ, რომ რომელიღაც ფირმა რომელიც დაღესტანში მოქმედებს ყველა ქართული ბრენდის რეგისტრირებას თავის თავზე ახდენდა. ასევე პროვოკაციად ვაფასებ სურვილსაც ესაუბრო მხოლოდ ოპოზიციას", _ აცხადებს დრობიზი.
"თუმცა, მათ ვინც ამ საქმეში ონიშჩენკო ჩართო წარმატების სჯერათ', _ წერს "იზვესტია" და მოლაპარაკებების მონაწილეს, რუსეთში ქართული დიასპორის ერთ-ერთ ლიდერს ვლადიმერ ხომერიკის სიტყვებს იმოწმებს: "მოლაპარაკებები მაისის დღესასწაულების შემდეგ მალევე გაიმართება", _ ამბობს ხომერიკი და აღნიშნავს, რომ საქარველოს ორი წარმომადგენელი უკვე ჩართო ღვინოზე ტექნიკური რეგლამენტის შემუშავებაში.
