საქართველოს პრეზიდენტი ლიტველ კოლეგას მხარდაჭერისთვის მადლობას უხდის.
მიხეილ სააკაშვილმა თბილისში ვიზიტით მყოფ დალია გრიბაუსკაიტეს მადლობა დღეს პირადად გადაუხადა და აღნიშნა, რომ მისი გაპრეზიდენტების შემდეგ ჩვენი ქვეყნისადმი ლიტვის მხარდაჭერა კიდევ უფრო გაძლიერდა.
"მას შემდეგ, რაც ქალბატონი გრიბაუსკაიტე გახდა პრეზიდენტი, ყველა საერთაშორისო ორგანიზაციაში, მათ შორის ევროკავშირსა და ნატოში, ლიტვა განსაკუთრებულად ხმალამოღებით იბრძვის საქართველოს ინტერესების დასაცავად და ჩვენი ქვეყნის ინტეგრაციისთვის ამ ორგანიზაციებში. როცა რამე გვიჭირს, ჩვენთან პირველ რიგში მოდიან სწორედ ლიტველები", - განაცხადა მიხეილ სააკაშვილმა, რომელმაც ლიტველ კოლეგას თბილისის დღეს პირადად დაათვალიერებინა.
მისივე შეფასებით, ლიტვა საქართველოსთვის დიდი მნიშვნელობის მქონე მოკავშირეა.
"ჩვენს შორის დიდი ურთიერთობები არსებობს. ლიტვის რესპუბლიკის ახალი პრეზიდენტის პირველი ვიზიტი საქართველოში არის სწორედ ამ თბილისი ურთიერთობებისა და მხარდაჭერის დადასტურება", - აღნიშნა საქართველოს პრეზიდენტმა.
ლიტვის პრეზიდენტი დალია გრიბაუსკაიტე თბილისში გუშინ ჩამოვიდა. საქართველოში პირველი ოფიციალური ვიზიტის ფარგლებში ის პრეზიდენტ სააკაშვილს შეხვდა.
დალია გრიბაუსკაიტე თბილისში ბაქოდან ჩამოვიდა, საქართველოდან კი ის დღეს სომხეთში გაემგზავრა.
