პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ლაშა თორდია უკრაინის სახალხო დეპუტატს, ვლადიმერ ლანდიკს შეხვდა.
შეხვედრაზე მხარეებმა ორი ქვეყნის პარლამენტებს შორის სამომავლო თანამშრომლობის საკითხები განიხილეს.
უკრაინელი დეპუტატი, რომელიც უკრაინის რადაში სიტყვის თავისუფლების ქვეკომიტეტს ხელმძღვანელობს, საქართველოში მიმდინარე რეფორმებით დაინტერესდა, განსაკუთრებით კი სიტყვის თავისუფლებასთან დაკავშირებული პრობლემების გადაჭრის გზებით.
როგორც თორდიამ განაცხადა, უკრაინელი პარტნიორები დაინტერესებული არიან იმ რეფორმებით, რომლებიც საქართველოში წარმატებულად განხორციელდა და ხორციელდება.
უკრაინელმა სტუმარმა ქართველ კოლეგებთან თანამშრომლობის სურვილი განსაკუთრებით იმ საკითხებზე გამოთქვა, რომლებიც მოქალაქეთა რეგისტრაციას, ჯანმრთელობის დაცვას, სიტყვის თავისუფლებას უკავშირდება და რომლებშიც ჩვენს ქვეყანას გარკვეული მიღწევები აქვს.
შეხვედრას უკრაინის საგანგებო და სრულუფლებიანი ელჩი საქართველოში ვასილ ციბენკოც დაესწრო.