დღეს, 1-ელ მაისს, კვირაცხოვლობას დედაქალაქზე ჯვრის სახით მოლოცვა სალიტანიო ანჩისხატით დასრულდება. ამჯერად სალიტანიო ანჩისხატი დაბრძანებულია ვაზისუბნის ვახტანგ გორგასლის სახელობის ტაძარში, საიდანაც 1 მაისს-კვირაცხოვლობის წირვის შემდეგ 11:00 სთ-ზე ხატი წამობრძანდება მეტეხის ხიდთან. მსვლელობას ხიდზე შემოუერთდება სხვადასხვა ტაძრის მრევლი.
15:00 სთ-ზეMსალიტანიო ანჩისხატი მეტეხის ხიდიდან საზეიმო სვლით აბრძანდება მთაწმინდაზე.
ბოლოს, 17:00 სთ-ზე ხატი დაბრძანდება ხელოვნების მუზეუმის წინ არსებულ სამლოცველოში, სადაც აღევლინება სადღესასწაულო ლოცვა-გალობა.
სრულიად საქართველოს კათოლიკოს-პატრიარქის ლოცვა-კურთხევით ანჩისხატის სალიტანიო კანონიკურმა ასლმა წლების განმავლობაში საქართველოს ტაძრები, ათონის მთა, იერუსალიმი და ევროპის წმიდა ადგილები მოილოცა _ საქადაგო მოწოდებით ,,სიწმიდეები გვიხმობენ."
წელს, დიდ მარხვაში (17 აპრილს) ბზობას სალიტანიო ანჩისხატით დაიწყო დედაქალაქის ტაძრების შემოლოცვა ჯვრის სახით. ფონიჭალიდან _ მცხეთის ჯვრამდე და მახათას მთიდან _ მთაწმინდამდე.
ჯვარი ეწეროს ჩვენს დედაქალაქსა და სამშობლოს _ დასაცავად და დასაფარავად ყოვლისა ბოროტისაგან. ამინ.
