საქართველოს პრეზიდენტ მიხეილ სააკაშვილის განცხადებით, ყველაფერი კეთდება იმისთვის, რომ შეიარაღებული ძალების მაქსიმალური მოდერნიზაცია მოხდეს.
"ჩვენ გავაგრძელებთ შეიარაღებული ძალების ყველანაირი ძალით მხარდაჭერას. მაქსიმალურ მოდერნიზაციას და მივაღწევთ იმას, რომ საქართველოს შეიარაღებული ძალები (გამომდინარე იმ ამოცანებიდან, რომელიც ჩვენს შინაშეა), იყოს ძალიან კარგად მომზადებული, კარგად აღჭურვილი და მზად ყველა ამოცანის შესასრულებლად, მათ შორის თითქმის შეუძლებელი ამოცანების შესასრულებლადაც კი", - განაცხადა მიხეილ სააკაშვილმა ვაზიანის სამხედრო პოლიგონზე ყოფნისას, სადაც ამოცანაზე ორიენტირებული საველე სწავლება "ვაზიანი 2011"-ის მიმდინარეობას გაეცნო.
მისივე განმარტებით, დღეს, ბაზაზე სტუმრობისას ის კიდევ ერთხელ დარწმუნდა, რომ მიუხედავად საქართველოს მტრის ყველანაირი მცდელობისა, წელში გაეტეხა შეიარაღებული ძალები, მოეხდინა ჩვენი საბრძოლო შემადგენლობის დემორალიზება, "მოვახერხეთ არა მხოლოდ საბრძოლო სულისკვეთების შენარჩუნება, არამედ მოდერნიზაციის ჩქარი ტემპით გაგრძელება და დაჩქარებაც კი".
"რა თქმა უნდა, სწავლებების დროს მტერი არის ჰიპოტეტიური, მაგრამ ჩვენ ძალიან კარგად ვიცით, ვინ არის საქართველოში შემოჭრილი, ვინ ახდენს ჩვენი ტერიტორიების ოკუპაციას და ვის აქვს შემდგომი აგრესიული გეგმები საქართველოს მიმართ. თქვენ ისიც კარგად იცით, რომ თქვენ ხართ მთავარი ხაზი საქართველოს დაცვისა. რა თქმა უნდა, როცა ქვეყანას პრობლემები აქვს და როცა ქვეყანას უტევენ, მისი ყველა მოქალაქე ხდება ჯარისკაცი, სამშობლოს დამცველი, მაგრამ თქვენ ხართ მთავარი, წინა გადამწყვეტი ხაზი ჩვენი თავდაცვის, მთავარი გარანტი ჩვენი თავდაცვის უსაფრთხოების", - მიმართ ქვეყნის პირველმა პირმა სამხედროებს.
ამასთან, მიხეილ სააკაშვილის თქმით, ის შეიარაღებ ძალებში მიმდინარე რეფორმებს თვალყურს პირადად ადევნებს.
"ბოლო წლებში სერიოზული რეფორმები გატარდა. ყოველი თვე, ყოველი კვირა უნდა იყოს შეიარაღებული ძალებისთვის სიახლის მომტანი. ამას ყურადღებით ვადევნებ თვალს", - აღნიშნა მიხეილ სააკაშვილმა.
შეგახსენებთ, რომ ვაზიანის სამხედრო პოლიგონზე ამოცანაზე ორიენტირებული საველე სწავლება "ვაზიანი 2011" იმართება. სწავლებაში საქართველოს შეიარაღებული ძალების სხვადასხვა გვარეობების ქვედანაყოფები მონაწილეობენ.