საქართველოს პრეზიდენტი მიხეილ სააკაშვილი ღრმა მწუხარებას გამოთქვამს ამერიკის შეერთებული შტატების სამხრეთ-აღმოსავლეთში ციკლონური შტორმით გამოწვეული ტორნადოს შედეგად დატრიალებული ტრაგედიის გამო, რომელმაც ასეულობით ადამიანი იმსხვერპლა და ათასობით უსახლკაროდ დატოვა. ამის შესახებ ინფორმაცია პრეზიდენტის ოფიციალურ ვებგვერდზეა გამოქვეყნებული.
"საქართველოს პრეზიდენტი, ქართველი ხალხის სახელით, თანაგრძნობას უცხადებს ამერიკის შეერთებული შტატების მთავრობას, ამერიკელ ხალხს და უსამძიმრებს დაღუპულთა ოჯახებს", - აღნიშნულია განცხადებაში.
შეგახსენეთ, რომ ამერიკის შეერთებული შტატების სამხრეთ-აღმოსავლეთში ციკლონური შტორმით გამოწვეული ტორნადოს შედეგად 300-მდე ადამიანი დაიღუპა და ათასობით ოჯახი უსახლკაროდ დარჩა.
