"ქრისტიან-დემოკრატები" საპარლამენტო უმრავლესობას სახალხო დამცველის ანგარიშის განხილვის დაწყების გაჭიანურებაში ადანაშაულებენ. ამის შესახებ ფრაქცია "ქრისტიან-დემოკრატების" თავმჯდომარემ გიორგი ახვლედიანმა დღეს გამართულ ბრიფინგზე განაცხადა.
"ერთი თვეა პარლამენტში შემოსულია სახალხო დამცველის ანგარიში 2010 წელს ადამიანის უფლებების მდგომარეობის შესახებ. აპრილის დასაწყისში საპარლამენტო უმრავლესობა აცხადებდა, რომ მათ ერთი თვე დასჭირდებოდათ ანგარიშის გასაცნობად და გადასამოწმებლად. შესაბამისად, სახალხო დამცველის პარლამენტში მოწვევის და მისი ანგარიშის განხილვის თარიღად მაისის პირველი რიცხვები დასახელდა", - აღნიშნა ახვლედიანმა.
ოპოზიციონერი დეპუტატის თქმით, პლენარულ სხდომაზე გატანამდე ანგარიში საპარლამენტო კომიტეტებში უნდა განიხილონ, თუმცა ეს პროცესი ჯერჯერობით მკვდარი წერტილიდან არ იძვრის.
"სწორედ ეს აჩენს ეჭვს, რომ ხელისუფლება ხელოვნურად აჭიანურებს ანგარიშის განხილვას, რადგან მასში მოყვანილი ფაქტები სხვადასხვა სფეროში ჩადენილ უამრავ დანაშაულს წარმოაჩენს", - აცხადებს დეპუტატი.
"ქრისტიან-დემოკრატები" მოითხოვენ, სასწრაფოდ დაიწყოს პარლამენტში სახალხო დამცველის ანგარიშის განხილვა.
