საქართველოში ევროკავშირის სადამკვირვებლო მისიის ხელმძღვანელის ჰანს იორგ ჰაბერის შემცვლელის ვინაობა მაისის დასაწყისში დასახელდება. ამის შესახებ თავად ჰაბერმა განაცხადა.
ევროკავშირის სადამკვირვებლო მისიის ხელმძღვანელის განმარტებითვე, საქართველოსთან გარკვეულიწად მისი ახალი თანამდებობაც იქნება დაკავშირებული.
"მე ვუხელმძღვანელებ განყოფილებას, რომელიც მოიცავს ყველა სამოქალაქო მისიას, საქართველოს მისიის ჩათვლით. რასაკვირველია, დიდი ინტერესით მივადევნებ თვალს იმას, რაც საქართველოს შეეხება. მისიას კი სხვა ხელმძღვანელი ეყოლება. მას მაისის დასაწყისში შევარჩევთ", - განუცხადა ჰანსიორგ ჰაბერმა რადიო "თავისუფლებას".
საქართველოში ევროკავშირის მეთვალყურეთა მისიის ხელმძღვანელს ამ პოსტზე უფლებამოსილება რამდენიმე დღეში ეწურება. ჰანსიორგ ჰაბერი მისიას მისი დაარსებიდან - 2008 წლის შემოდგომიდან თავმჯდომარეობდა. ის საქართველოს რამდენიმე დღეში დატოვებს.
უკვე ცნობილია მისი ახალი თანამდებობაც. ერთი თვის წინ მას ევროკავშირის უმაღლესმა წარმომადგენელმა ქეთრინ ეშტონმა ევროკავშირის სამოქალაქო ოპერაციების დაგეგმვისა და წარმართვის უწყება ჩააბარა.