22 აპრილს საქართველოს ოფიციალური ვიზიტით საფრანგეთის ეკოლოგიის, მდგრადი განვითარების, ტრანსპორტისა და ბინათმოწყობის მინისტრის მოადგილე ტრანსპორტის დარგში ტიერი მარიანი ეწვევა. მარიანი საქართველოს ეკონომიკისა და მდგრადი განვითარების მინისტრ ვერა ქობალიას მოწვევით ესტუმრება.
მარიანი საქართველოს პრეზიდენტ მიხეილ სააკაშვილთან ერთად მონაწილეობას მიიღებს ფოთის აეროპორტში ფრანგული კომპანია "Thales"-ის მიერ დამონტაჟებული სამოქალაქო რადარის გახსნაში.
ცერემონიას საფრანგეთის ელჩი საქართველოში ერიკ ფურნიეც დაესწრება.
საქართველოს მთავრობის წარმომადგენლებთან ერთად, მარიანი სამოქალაქო ავიაციის სფეროში თანამშრომლობის ხელშეკრულებას ხელს მოაწერს.
მარიანი საქართველოს 23 აპრილს დატოვებს.