აჭარელ ფერმერებს განვადების სარგებლობა, შპს "აგროგეოს", შპს "ჰერმესის" და შპს "ფერმერთა სახლის" სერვის ცენტრებში შეეძლებათ,
აჭარის მთავრობის პრესსამსახურის ინფორმაციით, რეგიონში მოქმედი აგროსერვის ცენტრები ფერმერებს მცენარეთა დაცვის საშუალებებს, სასუქებსა და ტექნიკურ ინვენტარს განვადებით სთავაზობს.
ფერმერებს 10-თვიან უპროცენტო სესხს ბანკი "კრედო" სთავაზობს. პროექტში მონაწილეობის მსურველებმა აგროცენტრებში სპეციალური ბლანკები უნდა შეავსონ, სადაც სასურველი აგროტექნიკური საშუალებების რაოდენობას მიუთითებენ.
გარდა ამისა, შეღავათებია სესხის დაფარვის კუთხითაც. თანხის გადახდის გრაფიკი ფერმერისა და ბანკის მოლაპარაკების საფუძველზე გადაწყდება. ფერმერს საშუალება მიეცემა სესხი, ეტაპობრივად, 10 თვის ვადაში დაფაროს ან მოსავლის აღების შემდეგ თანხა ერთდროულად გადაიხადოს.
ხელვაჩაურის ფერმერთა სახლში მისულ ფერმერებს, დღეს პროექტის დეტალები აჭარის მთავრობის თავმჯდომარემ და სოფლის მეურნეობის მინისტრმა განუმარტეს. როგორც ლევან ვარშალომიძემ განმარტა, აღნიშნული პროექტი ფერმერებს საშუალებას მისცემს მცენარეები დროულად შეწამლონ და ხარისხიანი მოსავალი მიიღონ.
"პროექტის ფარგლებში ფერმერებს საშუალება ექნებათ დროულად და ხარისხიანად უზრუნველყოს ციტრუსოვანთა ბაღებში აგროტექნიკური ღონისძიებების ჩატარება, რაც გაზრდის მოსავლიანობას, პროდუქციის ხარისხს, და მის კონკურენტუნარიანობას საექსპორტო ბაზრებზე", - აღნიშნა ლევან ვარშალომიძემ.