ისრაელი აფხაზეთის დე-ფაქტო ხელისუფლებასთან სამხედრო სფეროში თანამშრომლობას გამორიცხავს.
როგორც საგარეო საქმეთა მინისტრის მოადგილე ნინო კალანდაძემ დღეს გამართულ ტრადიციულ პრესკონფერენციაზე განაცხადა, შესაბამისი პირობა თბილისმა ოფიციალური თელ-ავივისგან მიიღო.
"როგორც კი გავრცელდა ინფორმაცია, რომ აფხაზეთში ისრაელის დელეგაცია იმყოფებოდა, ჩვენ საქართველოში ისრაელის ელჩი დავიბარეთ და პირადად მისგან მივიღეთ ოფიციალური მხარის პირობა იმის თაობაზე, რომ ისრაელსა და მარიონეტულ რეჟიმს შორის არავითარ სამხედრო თანამშრომლობას ადგილი არ ექნება. ეს ლიცენზირებული საქმიანობაა, რომელიც მხოლოდ კერძო ბიზნესს არ წარმოადგენს და მას მთავრობის ნებართვა სჭირდება. ისრაელი კი მსგავს ლიცენზიას არც ერთ კომპანიაზე არ გასცემს", - განაცხადა კალანდაძემ და აქვე განმარტა, რომ თელ-ავივთან არსებული შეთანხმებით, აფხაზეთში სამხედრო წვრთნებიც კი არ ჩატარდება.
რაც შეეხება საქართველოს ოკუპირებულ ტერიტორიაზე ებრაელ ბიზნესმენთა გახშირებულ ვიზიტებს, კალანდაძის თქმით, აღნიშნულის აღსაკვეთად ქართულ მხარეს რამდენიმე, მათ შორის სამართლებრივი ბერკეტიც გააჩნია, თუმცა ამ ეტაპზე მისი ამოქმედების აუცილებლობას ვერ ხედავს.
"იქედან გამომდინარე, რომ აფხაზეთში კონკრეტულ ბიზნესსაქმიანობას ადგილი ჯერჯერობით არ ჰქონია, თავს ვიკავებთ ყველანაირი დამატებითი ბერკეტის ამოქმედებისგან და იმედს ვიტოვებთ, რომ ოკუპირებულ ტერიტორიაზე ებრაელ ბიზნესმენთა ვიზიტებთან დაკავშირებული პრობლემა ამის გარეშეც მოგვარდება", - აღნიშნა მინისტრის მოადგილემ.
