ესპანეთის სამართალდამცავებმა ორი ნახატი აღმოაჩინეს, რომლებიც 1997 წელს მოიპარეს. საუბარია ელ გრეკოს "ხარებასა" და გოიას "ქალწულ პილარის გამოცხადებაზე".
ჯერ კიდევ ოქტომბერში სამართალდამცავებმა ოპერატიული ინფორმაცია მიიღეს, რომლის თანახმადაც, გატაცებული ხელოვნების ნიმუშები, სავარაუდოდ, გაიყიდა.
კანონის დამცველებმა მოკვლევა ჩაატარეს, რის შედეგადაც მოპარული შედევრების კვალს ალიკანტში მდებარე კერძო სახლში მიაკვლიეს. ამ დრომდე უცნობია, თუ ვისი კუთვნილება იყო ეს ნამუშევები.
ცნობილია, რომ ნახატების მოპარვამდე მათი მფლობელი კერძო კოლექციონერი იყო. 1990-იან წლებში შედევრების მფლობელმა ამ ნამუშევართა საზღარგარეთ საგამოფენოდ წაღება გადაწყვიტა. თუმცა, როცა ექსპოზიცია ესპანეთს დაუბრუნდა, ნამუშევრები სათვალავს აკლდა.
გოიასა და ელ გრეკოს ნამუშევრების ღირებულების დადგენა ჭირს, რადგან ამ მხატვართა ტილოები იშვიათად გამოაქვთ გასაყიდად. თუმცა 2004 წელს ელ გრეკოს "ქრისტეს ნათლობა" ლონდონის Christie's-ის აუქციონზე 1,449 მილიონ დოლარად გაიყიდა, ხოლო ამავე აუქციონზე გოიას "მკვდარი კურდღლებისთვის" მყიდველმა 5 მილიონი დოლარი გადაიხადა.
