ვაჭრობის მსოფლიო ორგანიზაციაში გაწევრიანებასთან დაკავშირებით რუსეთსა და საქართველოს შორის არსებულ დავაში შუამავლობაზე აშშ შეგნებულად უარს ამბობს. ამის შესახებ აშშ-ის პრეზიდენტ ბარაკ ობამას მთავარმა მრჩეველმა ევრაზიის საკითხებში მაიკლ მაკფოლმა განაცხადა.
მისი თქმით, ვაშინგტონი ამ დავის პოლიტიზირებისა და მის ხარჯზე სხვა საკითხების გადაწყვეტის წინააღმდეგია.
მაკფოლის განმარტებით, აშშ-მა "კატეგორიული სიცხადით" განუმარტა თბილისს, რომ ვმო-ში გაწევრიანებასთან დაკავშირებით გამართული მოლაპარაკებები რუსეთსა და საქართველოს შორის პოლიტიკური დავის დარეგულირების მექანიზმი არ არის.
"ამასთან, მოსკოვსაც ერთმნიშვნელოვნად განვუმარტეთ, არ ელოდონ ჩვენგან, რომ ჩვენ საქართველოზე ზეწოლას მოვახდენთ", - აცხადებს მაკფოლი.
მაკფოლის განმარტებით, კონსესუსი სწორედ სამუშაო ჯგუფის ფარგლებში უნდა იქნას მიღწეული. მისი თქმით, ემბარგოს საკითხი გადაწყვეტადია და იგი მოგვარდება კიდეც. თუმცა მაკფოლის აზრით, საზღვრის პრობლემა "ფუნდამენტურია".
თეთრი სახლის წარმომადგენელი, ამასთან, აცხადებს, რომ აშშ ნათლად უხსნის ორივე მხარეს, რომ ისინი ვმო-სთან დაკავშირებით გამართული მოლაპარაკებების ხარჯზე საკუთარი სუვერენიტეტის საკითხებს ვერ გადაწყვეტენ.
"ეს ცუდი სტრატეგიაა, ვერცერთ მხარეს ვერ დავუჭერთ მხარს. ჩვენ პოლიტიზაციის წინააღმდეგნი ვართ", - განმარტა მაკფოლმა.
