მსოფლიო ბანკის სამხრეთ კავკასიის რეგიონის დირექტორის ასლან ალიმის შეფასებით, საქართველომ ეკონომიკურ კრიზისს თავი დააღწია.
"ფასების ზრდა გლობალური ფენომენია. ეს წყალდიდობებმა და საკვებზე მოთხოვნილების გაზრდამ გამოიწვია. საქართველოში კი, როგორც ყველა სხვა ქვეყანაში, რომელიც იმპორტზეა დამოკიდებული, ეს შიდა ბაზარზე აისახა. ფასების ინფლაციასთან ბრძოლა მოკლე და გრძელვადიანი პროექტებითაა შესაძლებელი... საქართველო წელს 6-ზე მეტ პროცენტიან ეკონომიკურ ზრდას ელოდება. ეს ნიშნავს, რომ მან თავი დააღწია კრიზისს. ბიზნესის კეთების სიადვილე კი იზიდავს უცხოელ ინვესტორებს საქართველოში", - განაცხადა ასლან ალიმმა ვაშინგტონში გამართულ საერთაშორისო ეკონომიკურ კონფერენციაზე.
ამასთან, მან დადებითად შეაფასა სოფლის მეურნეობის სფეროს დაფინანსების გაორმაგების შესახებ საქართველოს მთავრობის გადაწყვეტილება და აღნიშნა, რომ ეს აუცილებელია, მიუხედავად იმისა, რომ აგრარულ სექტორში ინვესტიციების გაორმაგებას არ ექნება დაუყოვნებლივი შედეგი.
"ინვესტიციების გაორმაგებას არ ექნება დაუყოვნებლივი, მაგრამ სამაგიეროდ ექნება გრძელვადიანი შედეგი", - აღნიშნა მსოფლიო ბანკის სამხრეთ კავკასიის რეგიონის დირექტორმა.
