ჩეჩენი ბოევიკის შამილ ბასაევის ძმა ფინეთის სასამართლოში ქვეყანაში ჩეჩნების უკანონო მიგრაციის გამო წარდგება. პროცესზე მეორე ბრალდებულის სახით, ასევე, ტერორისტების საიტის "კავკაზცენტრის" მთავარ რედაქტორს წარადგენენ, რომელიც ფინეთში მოღვაწეობს. სწორედ ამ საიტით გავრცელდა ბოევიკთა მეთაურის დოკუ უმაროვის მიმართვა, რომელიც მოსკოვის "დომოდედოვოს" აეროპორტში მომხდარი ტერაქტის გამო პასუხისმგებლობას საკუთარ თავზე იღებდა.
ის ფაქტი, რომ 1984 წელს დაბადებული რუსეთის მოქალაქე აბდულახმიდ მეჩიევი 2006 წელს მოკლული ბასაევის ძმაა, გამოძიების მსვლელობით დადგინდა. ერთ-ერთი დაკითხვისას მეჩიევმა განაცხადა, რომ შამილ ბასაევის ძმაა და გარკვეულ პერიოდში მის ოჯახშიც იზრდებოდა.
24 თებერვალს საქმის წინასწარი განხილვის შემდეგ მეჩიევმა სახელი და გვარი შეიცვალა და ამჯერად მის საქმეს დენი ბერკატის ვინაობით იძიებენ.
საქმეში, ასევე, ჩართულია მიქაელ სტორშო, ჩეჩენი ტერორისტების საიტ "კავკაზცენტრის" მთავარ რედაქტორი, რომელიც დოკუ უმაროვის "რუპორი" გახლდათ. ჩეჩნების წინააღმდეგ სისხლის სამართლის სამი საქმე აღიძრა. მათ ფინეთის ტერიტორიაზე საკუთარ თანამემამულეთა არალეგალურ შეყვანაში ადანაშაულებენ.
ბრალდების თანახმად, მათ ფინეთში 100 ჩეჩენი შეიყვანეს. კერძოდ, ბრალდებულები მათთვის თურქეთიდან პეტერბურგამდე ჰელსინკის გავლით თვითმფრინავის ბილეთებს ყიდულობდნენ. გზად კი ჩეჩნები ფინეთში რჩებოდნენ. ზოგიერთი მათგანს ადგილობრივი მიგრაციის სამსახური საკუთარ ქვეყანაში ცხოვრების უფლებას აძლევდა.
მიქაელ სტორშოს თქმით, ისინი ჰუმანიტარული მიზნით ეხმარებოდნენ ჩეჩნებს, რისთვისაც კომპენსაციას არ იღებდნენ. ამის მიუხედავად, პროკურორმა ბრალდებულთათვის თავისუფლების აღკვეთა მოითხოვა.
ფინეთის პროკურორი მიიჩნევს, რომ მიქაელ სტორშო, როგორც მთავარი რედაქტორი, არა მარტო მხარს უჭერდა ჩეჩენ ბოევიკთა მეთაურს დოკუ უმაროვს, არამედ სეპარატისტებისთვის ფულსაც აგროვებდა.
შეგახსენებთ, ფინეთში წარმატებით მუშაობს ჩეჩნების საიტი "კავკაზცენტრი", რომელზეც ბოევიკთა მეთაურის დოკუ უმაროვის მიმართვაც გამოქვეყნდა. რუსეთის ხელისუფლების მოწოდების მიუხედავად, ფინეთის ადმინისტრაცია საიტის აკრძალვას არ აპირებს. ამის შესახებ ფინეთის საგარეო საქმეთა მინისტრმა ალექსანდრე სტუბმა განაცხადა.
