ბერლინში ნატო-საქართველოს კომისიის სხდომა დასრულდა. მონაწილეებს ალიანსის გენერალური მდივანი მიესალმა და ქართულლ მხარეს გლობალური უსაფრთხოების საკითხში შეტანილი წვლილისათვის მადლობა გადაუხადა.
ანდერს ფოგ რასმუსენმა ამ მიმართულებით საქართველოს როლს უმნიშვნელოვანესი უწოდა, გამოყო ჩვენს ქვეყანაში მიმდინარე რეფორმები და ისინი დადებითად შეაფასა.
ნატოს გენერალური მდივნის თქმით, სხდომის მთავარი მიზანი, ახლა საქართველოსა და ნატოს შორის ურთიერთობის კიდევ უფრო გაღრმავებაა.
"ბოლო წლების განმავლობაში საქართველოს ურთიერთობა ნატოსთან ძალიან ღრმა და მნიშვნელოვანია, ისევე როგორც მთელს ევროატლანტიკურ სივრცესთან. საქართველო ძალიან მნიშვნელოვან როლს ასრულებს ალიანსთან ერთად გლობალური უსაფრთხოების მხრივ. მე მინდა გამოვიყენო შესაძლებლობა და ნატოს ყველა წევრის სახელით მადლობა გადავუხადო საქართველოს ავღანეთში ჩვენს ერთობლივ მისიაში მონაწილეობისათვის. მინდა მივუსამძიმრო ავღანეთში დაღუპული ქართველი სამხედროების ოჯახებს. დღევანდედ შეხვედრაზე ჩვენ ნატოსა და საქართველოს ურთიერთობების პროგრესს შევაჯამებთ. ნატო-საქართველოს კომისიის ფარგლებში ჩვენ ასევე ვაწარმოებთ პოლიტიკურ დიალოგს. ვთვლით, რომ ის პროგრამა, რომელიც საქართველოს დახმარებას გულისხმობს რეფორმების საკითხში წარმატებულია. დისკუსიის ფარგლებში არამარტო უკვე განხორციელებულ ქმდებებზე ვიმსჯელებთ, ჩვენ მომავლისკენაც ვიყურებით და ვსახავთ პრიორიტეტებს", _ განაცხადა ნატოს გენერალურმა მდივანმა.
შეგახსნებთ, რომ ნატო-საქართველოს კომისიის სხდომა ალიანსის სამიტის ფარგლებში ჩატარდა.
