ქართული მხარე ოკუპირებულ ტერიტორიებზე მცხოვრებლებს განათლებისა და ჯანდაცვის სფეროებში დახმარებას სთავაზობს. როგორც დღეს, ჟურნალისტებს რეინტეგრაციის საკითხებში სახელმწიფო მინისტრმა, ეკა ტყეშელაშვილმა განუცხადა, ოკუპირებული ტერიტორიების სტრატეგიის კუთხით არის მთელი რიგი მიმართულებები რომლის განხორციელებაც ხელისუფლებას სურს, მათ შორის, სამედიცინო დახმარების სფეროში.
"ხელისუფლების მხრიდან ჯანდაცვის სფეროს კუთხით გაცემულია კონკრეტული დახმარებები ოკუპირებულ ტერიტორიაზე მცხოვრები მოსახლეობისთვის, რომლებიც მიუხედავად მათი ეთნიკური წარმომავლობისა ჩვენი თანამოქალაქეები არიან", - აღნიშნა ტყეშელაშვილმა.
მისივე თქმით, ასევე დიდი აქცენტი გაკეთდება განათლების სფეროზე, თუ რის შეთავაზება შეიძლება ოკუპაციაში მცხოვრები მოსახლეობისთვის.
"სტრატეგიის მიზანია, რაც შეიძლება მეტი კავშირის აღდგენა, თუნდაც არაფორმალურად", - დასძინა ტყეშელაშვილმა და აქვე აღნიშნა, რომ სახელმწიფო მინისტრის აპარატი პარლამენტთან ნაყოფიერად თანამშრომლობს.
ამასთან, სახელმწიფო მინისტრმა ოკუპირებული ტერიტორიების მიმართ სახელმწიფო სტრატეგიისა ("ჩართულობა თანამშრომლობის გზით") და მისი სამოქმედო გეგმის განსახორციელებლად მიმდინარე მუშაობის შესახებ ინფორმაცია დეპუტატებს ტერიტორიული მთლიანობის აღდგენის დროებითი კომისიის სხდომაზე მოაწოდა.
