"ქრისტიან-დემოკრატიული მოძრაობის" ერთ-ერთი ლიდერის, ლევან ვეფხვაძის შეფასებით, ახლა "რვიანს" ფეხი-ფეხზე გადადების მდგომარეობა ნამდვილად არ აქვს.
"ხელისუფლებასთან საარჩევნო გარემოს გაუმჯობესების საკითხზე მოლაპარაკებები გარკველწილად ჩიხურ მდგომარეობაშია შესული. ეს არ ნიშნავს, რომ პოლიტიკურმა პარტიებმა ფეხი-ფეხზე გადავიდოთ და დავისვენოთ. პირიქით, უნდა ვიყოთ პროაქტიურები, შევხვდეთ საზოგადოების წარმომადგენლებს და შევქმნათ გარკვეული საზოგადოებრივი აზრი", - განუცხადა ვეფხვაძემ ჟურნალისტებს.
მისივე განმარტებით, პირადად ის, აღნიშნული მოლაპარაკებების გაგრძელების აზრს ვერ ხედავს იქამდე, ვიდრე ხელისუფლების მხრიდან საკითხისადმი კონსტრუქციული მიდგომა არ მოხდება.
"სანამ ხელისუფლების აზრი არ გახდება ცნობილი, შეხვედრების გაგრძელების აზრს ვერ ვხედავ, ჯერ უნდა დავინახოთ მეორე მხრიდან კონსტრუქციული მიდგომა. ცესკოში ტყუილა სიარული ნამდვილად დროის დაკარგვა იქნება", - აღნიშნა ვეფხვაძემ არასამთავრობოებსა და "ქართული აკადემიის" წარმომადგენლებთან შეხვედრის შემდეგ, რომელთაც "რვიანმა" საარჩევნო გარემოს გაუმჯობესებასთან დაკავშირებით, ხელისუფლებასთან გამართული მოლაპარაკებების შეჩერების მიზეზები განუმარტა.
შეგახსენებთ, რომ საარჩევნო გარემოს გაუმჯობესების საკითხზე ხელისუფლებასა და ოპოზიციას შორის მიმდინარე მოლაპარაკებების 5 თვის თავზე, პოლიტიკური უმცირესობის წარმომადგენლები იმ დასკვნამდე მივიდნენ, რომ ხელისუფლებას საარჩევნო გარემოს შეცვლის პოლიტიკური ნება არ გააჩნია.
