კონსერვატიული პარტიის ლიდერის ზვიად ძიძიგურის მტკიცებით, პოლიტიკური "რვიანი" არანაირ ჩიხში არ შესულა.
"არანაირ ჩიხში ჩვენ არ შევსულვართ. ჩვენ ველოდით, რომ მოლაპარაკებების პროცესში ხელისუფლება "გაჭედავდა". ასე რომ, ჩვენს მიერ შეთავაზებულ წინადადებებზე მისი უარი "რვიანისთვის" მოულოდნელობა არ ყოფილა", - განაცხადა ძიძიგურმა არასამთავრობოებსა და "ქართული აკადემიის" წარმომადგენლებთან შეხვედრაზე, რომელთაც საარჩევნო გარემოს გაუმჯობესებასთან დაკავშირებით, ხელისუფლებასთან გამართული მოლაპარაკებების შეჩერების მიზეზები განუმარტეს.
მისივე განმარტებით, ოპოზიცია ხელისუფლებასთან "სამართლებრივ დუელში" შევიდა და "პირწმინდად დაამარცხა" კიდეც.
"ხელისუფლების დამარცხება იმაში გამოიხატება, რომ ჩვენ მას საარჩევნო გარემოს გაუმჯობესების თაობაზე კვალიფიციური წინადადებები წარვუდგინეთ. გამარჯვებული კი ის არის, ვის მხარესაცაა არგუმენტი და ლოგიკა", - აღნიშნა ძიძიგურმა.
