სამართლებრივი თვალსაზრისით აფხაზი სეპარატისტები რუსულ მხარეს აფხაზეთის ტერიტორიას ვერ გადასცემენ. ამის შესახებ "ჯი-ეიჩ-ენს" ტერიტორიული მთლიანობის აღდგენის დროებითი კომისიის თავმჯდომარემ შოთა მალაშხიამ აფხაზურ-რუსული ე.წ. სახელმწიფო საზღვრის დელიმიტაცია-დემარკაციის საკითხებისადმი მიძღვნილ სხდომის შესახებ შეფასებისას განუცხადა.
"სამართლებრივი თვალსაზრისით, ეს არის რუსეთის მიერ ოკუპირებული ტერიტორია და რამე ნაწილის კიდევ გადაცემა სამართლებრივი თვალსაზრისით შეუძლებელია. თუმცა ამის სურვილი აფხაზეთის სეპარატისტულ ხელისუფლება აქვს", - აღნიშნა მალაშხიამ.
მისივე თქმით, საქართველოს კონტროლირებად ტერიტორიაზე მცხოვრები აფხაზები გეგმავენ აღნიშნულ საკითხთან დაკავშირებით აფხაზეთში მცხოვრებ საზოგადოებას მიმართონ, რომ მსგავსი ფაქტი არ დაუშვან.
"ე.წ. ხელისუფლება რუსეთისთვის გარის მხარეს მდებარე ტერიტორიების გადაცემას გეგმავს", - აღნიშნა "ჯი-ეიჩ-ენთან" საუბრისას მალაშხიამ.
შეგახსენებთ, რომ დღეს, მოსკოვში, საგარეო საქმეთა სამინისტროში მიმდინარე თვის ბოლო ე.წ. რუსულ-აფხაზური ორმხრივი კომისია შეიკრიბება, რომელიც "რუსეთის ფედერაციასა და აფხაზეთს შორის არსებული სახელმწიფო საზღვრის დელიმიტაცია-დემარკაციიის სამუშაოს საკითხებს განიხილავს".
აღნიშნულთან დაკავშირებით სეპარატისტულ აფხაზეთში მოქმედი პოლიტიკური პარტია "სახალხო ერთიანობის ფორუმი" სხდომასთან დაკავშირებით საგანგებო განცხადებით გამოდის და აღნიშნავს, რომ აფხაზური საზოგადოებაში არის მოსაზრება იმის შესახებ, რომ ამ სხდომაზე შესაძლოა მოსკოვმა აფხაზეთის ტერიტორიის 160 კილომეტრის დათმობა მოითხოვოს.
