"ჩემი, როგორც წარსულში ბიზნესმენის, რეკომენდაცია იქნება ქართველი ბიზნესმენებისადმი, ძალიან ნუ დაუჯერებენ მოსკოვიდან მოსულ დაპირებებს და ნუ იჩქარებენ",_აღნიშნა საქართველოს საგარეო საქმეთა მინისტრმა გრიგოლ ვაშაძემ ქართული პროდუქციის რუსეთში დაბრუნებასთან დაკავშირებით რუსეთის მთავარი სანიტარის შემოთავაზებაზე.
"ამისთანა შემოთავაზებები არა მარტო ამ უცნაური ფიგურისგან მოდის, არამედ_რუსეთის ხელისუფლების სხვა წარმომადგენლებისგანაც. ეს ქართული ბიზნესის კერძო საქმეა. სახელმწიფო ამაში ვერ ჩაერევა. ერთი ფაქტის კონსტანტაცია შემიძლია გავაკეთო, რომ ქართველი ბიზნესმენები არ ჩქარობენ რუსეთისკენ გამგზავრებას და ბატონ ონიშჩენკოს მიერ შექმნილ ლაბორატორიებში თავისი პროდუქციის ანალიზის ჩატარებას",_განაცხადა გრიგოლ ვაშაძემ.
მინისტრის თქმით, რუსეთის ეკონომიკის 70 % არის ე.წ. "ატკატი", რაც გულისხმობს, რომ ჩინოვნიკი არ აწერს ხელს არაფერს, სანამ არ მიიღებს სათადარიგო კონვერტს. ამის შემდეგ ქართველმა ბიზნესმენმა უნდა ჩაატაროს სარეკლამო კომპანია, იპოვოს დისტრიბუტორი, რომელსაც თვითონ უხდის ფულს, განათავსოს დისტრიბუტორის ქსელში თავისი პროდუქცია, რაც უზარმაზარი ხარჯია.
"რაც მთავარია, ბაზარი არის პოლიტიზირებული. არავითარი გარანტია არ არის, რომ რუსეთის ხელისუფლების რომელიმე წევრს ერთი თვის შემდეგ რაღაცაზე არ გაუწყრება გული, საქართველოს, თბილისის ან ჩვენი ხელისუფლების მოქმედებაზე და ქართული პროდუქცია ისევ არ აღმოჩნდება ემბარგოს ქვეშ",_აღნიშნა ვაშაძემ.
ცნობისთვის, რუსეთის მთავარი სანიტარის განცხადებით, იგი მზად არის დაელაპარაკოს ქართველ ბიზნესმენებს ქართული პროდუქციის რუსეთში დაბრუნებასთან დაკავშირებით.