საპარლამენტო უმრავლესობა სამთავრობო დებატებზე მინისტრებისგან არსებული პრობლემების და გამოწვევების მოგვარების გზებზე კონკრეტულ პასუხებს ელოდება.
ამის შესახებ საპარლამენტო უმრავლესობის ლიდერმა პეტრე ცისკარიშვილმა პრემიერ-მინისტრ ნიკა გილაურთან გამართული შეხვედრის შემდეგ განაცხადა, რომელშიც მონაწილეობას უმცირესობის და უმრავლესობის ლიდერებთან ერთად პარლამენტის თავმჯდომარე დავით ბაქრაძე იღებდა.
"უპრეცედენტო სამუშაო კვირა იქნება, რომელიც პარლამენტში გაიმართება. ერთის მხრივ უამრავი პროგრამა და პროექტი არსებობს, რომელზეც მთავრობა მუშაობს და ინფორმაცია ძალიან მწირია არ თუ საზოგადოებაში, ასევე პარლამენტშიც კი. ამიტომ ჩვენ ძალიან დეტალურად გვინდა გავარკვიოთ და ჩავეკითხოთ ამ პროგრამების შესახებ, მათი პერსპექტივების, განხორციელების ვადების და დაფინანსების წყაროების შესახებ", - აღნიშნა ცისკარიშვილმა.
მისივე თქმით, მთავრობის მიერ შემუშავებული დადებითი პროექტების და პროგრამების გარდა, უმრავლესობას ბერი შეკითხვა აქვს იმ პრობლემებთან და გამოწვევებთან დაკავშირებით რაც ქვეყანაში არსებობს.
"არსებული პრობლემებთან დაკავშირებით ჩვენ გავაინტერესებს მთავრობის ხედვა, თუ როგორ და რა გზებით აპირებენ ამ გამოწვევების მოგვარებას", - აღნიშნა ცისკარიშვილმა.
რაც შეეხება სამთავრობო დებატებზე ძალოვანი მინისტრების ჩართვას, უმრავლესობის ლიდერის თქმით, მათი მოსმენა არ მოხდება, რადგან ძირითადი აქცენტები სოციალურ-ეკონომიკურ საკითხებზე გამახვილდება, იმ თემებზე, რომელიც ხალხს ყველაზე მეტად აწუხებს.
"მოსმენები გაიმართება ეკონომიკური გუნდის მინისტრებთან, რადგან ეს არის თემები, რომელიც ყველაზე მეტად აწუხებს ხალხს. ასევე დებატების დევნილების და განათლების საკითხებზეც გაიმართება", - აღნიშნა პეტრე ცისკარიშვილმა.
დეპუტატის თქმით, მაშინ როდესაც, როგორც საქართველოში ასევე მთელ მსოფლიოში საზოგადოება ისეთი გამოწვევების წინაშე დგას, როგორიც არის ინფლაცია, ფასების ზრდა პროდუქტზე და ნავთობზე გაცილებით მნიშვნელოვანია ეკონომიკური და სოციალური პრობლემების გადაჭრის გზების შესახებ ინფორმაცია მიიღოს პარლამენტმა.
