თურქი ინვესტორების დახმარებით აჭარაში "მცირე საწარმოთა ზონა" შეიქმნება. თურქულმა კომპანია "ოსტინმა" საწარმოო ზონის შექმნის შესახებ ღიად განაცხადა. "ოსტინი" მზადაა, ასეთი ზონა 50 ჰექტარზე განათავსოს, სადაც რამდენიმე მცირე საწარმო აშენდება.
აჭარის მთავრობაში უკვე მუშავდება სპეციალური გეგმა, რომლის მიხედვითაც ავტონომიური რესპუბლიკის ტერიტორიაზე ზონის განსათავსებლად სპეციალური ადგილები შეირჩევა. აჭარის მთავრობაში აცხადებენ, რომ მთლიანობაში 3 პროექტი შემუშავბდება, რომელიც მომავალ კვირაში კომპანია "ოსტინს გადაეგზავნება და ინვესტორი სასურველ ვარიანტს შეარჩევს. თუმცა აჭარის მთავრობაში ინვესტორისათვის ხელსაყრელი პირობების შესაქმნელად, გარკვეული ინფრასტრუქტურის მშენებლობის საკითხსაც განიხილავენ.
შეგახსენებთ, რომ 8-10 მარტს აჭარის ავტონომიური რესპუბლიკის ფინანსთა და ეკონომიკის მინისტრი სამუშაო ვიზიტით თურქეთის რესპუბლიკაში იმყოფებოდა.ვიზიტის დროს მინისტრი თურქეთის რესპუბლიკის სახელმწიფო მინისტრებს ფარუქ შექინქშს და ზათურ ჩაღლაინს შეხვდა. მოეწყო შეხვედრა ასევე კომპანია ,,ოსტინში".
ვაჟა ბოლქვაძე შეხვდა ასევე, თურქეთის სამრეწველო პალატის ხელმძღვანელს ნურუთან ორდებირს და ანკარის სავაჭრო პალატის წარმომადგენლებს. დაათვალიერა სანჯანის ინდუსტრიული ზონა.
