ხელისუფლება საარჩევნო გარემოს გაუმჯობესების თაობაზე ოპოზიციის წინადადებებზე საკუთარი პოზიციების დაფიქსირებას დღეიდან, 9 მარტიდან, დაიწყებს. სამუშაო ჯგუფის სპეციალური შეხვედრა ცესკოში უკვე ჩაინიშნა.
როგორც "ჯი-ეიჩ-ენს" შეხვედრის მონაწილე პოლიტიკური რვიანის ერთ-ერთმა წარმომადგენელმა, საპარლამენტო უმცირესობის ლიდერმა გიორგი თარგამაძემ განუცხადა, სწორედ დღეს გამოჩნდება, სურს თუ არა ხელისუფლებას ქვეყნის საარჩევნო გარემოს რეალურად გაუმჯობესება.
"რეალურად, მოლაპარაკებები სწორედ დღეიდან დაიწყება. იმ კალკულაციიდან გამომდინარე, რომელიც ხმის ბიომეტრიული პასპორტებით მიცემის თაობაზე მმართველმა გუნდმა შემოგვთავაზა, არსებობს შანსი, კიდევ ხვალ მორიგი "სიურპრიზი" მოგვიწყოს, თუმცა იმედი მაქვს ხელისუფლება გონიერებით მოეკიდება ჩვენს მიერ შეთავაზებულ წინადადებებს და ასევე გონიერ პასუხებს მივიღებთ", - განმარტა თარგამაძემ.
ე.წ. რვიანის კიდევ ერთი წარმომადგენლის, "ახალი მემარჯვენეების" ლიდერ დავით გამყრელიძის თქმით კი, ოპოზიცია ყველა წამოჭრილ საკითზე ხელისუფლების პოზიციას მაქსიმუმ თვის ბოლომდე ელოდება.
"სწორედ თვის ბოლოსთვის გვექნება ზუსტი სურათი იმის თაობაზე, რას ფიქრობს ხელისუფლება ჩვენს წინადადებებზე, აპირებს თუ არა მის გათვალისწინებას და ზოგადად, ჰქონდა თუ არა აზრი ამ მოლაპარაკებებს", - განუცხადა"ჯი-ეიჩ-ენს" გამყრელიძემ.
შეგახსენებთ, რომ საარჩევნო გარემოს გაუმჯობესების მიზნით სამუშაო ჯგუფი გასული წლის შემოდგომაზე შეიქმნა. მის მუშაობაში ოპოზიციური სპექტრიდან რვა პარტია მონაწილეობს.
