ოფიციალურ თბილისს იმედი აქვს, რომ ეგვიპტეში მომხდარი რევოლუცია საქართველოს საინვესტიციო გარემოთი ქვეყნის დაინტერესებას ხელს ვერ შეუშლის.
"იმედი გვაქვს, რომ ყველა არსებული პროექტი, რომელზედაც ეგვიპტეში სიტუაციის დაძაბვამდე იყო საუბარი, ვითარების დაბალანსების შემდეგ ძალაში დარჩება და ჩვენი ურთიერთობა ისეთივე ფორმით შენარჩუნდება, როგორიც აქამდე იყო. მეტიც, იმედი გვაქვს, რომ მოვახერხებთ, ეკონომიკური და სავაჭრო ურთიერთობები კიდევ უფრო ინტენსიური გახდეს", - განაცხადა დღეს გამართულ ტრადიციულ პრესკონფერენციაზე საქართველოს საგარეო საქმეთა მინისტრის მოადგილე ნინო კალანდაძემ.
მისი განმარტებით, ეგვიპტე მნიშვნელოვანი სახელმწიფოა, რომელთანაც საქართველოს არა მხოლოდ კეთილმეგობრული, არამედ სავაჭრო და ეკონომიკური ურთიერთბები სურს.
შეგახსენებთ, რომ ეგვიპტელ ბიზნესმენებს საქართველოში ხორბლის საწარმოს შექმნა სურთ. ისინი ასევე პორტით არიან დაინტერესებული.
