აშშ-ის დედაქალაქ ვაშინგტონში, თეთრი სახლიდან დაახლოებით 1.6 კილომეტრში მდებარე ლოგან-სერკლის რაიონში სროლის შედეგად ხუთი ადამიანი დაიჭრა.
ამის შესახებ Associated Press სამართალდამცავ ორგანოებზე დაყრდნობით წერს.
პოლიციის პრესსპიკერის, ნიკოლ დინერის განცხადებით, თავდამსხმელი დაკავებული არ არის.
შემთხვევის ადგილზე მობილიზებულია პოლიციის დიდი რაოდენობა. ტერიტორიის მნიშვნელოვანი ნაწილი ალყაშია მოქცეული, ხოლო ახლომდებარე სკოლებში უსაფრთხოების მიზნით იზოლაციის რეჟიმი გამოცხადდა. სამართალდამცველებმა მოქალაქეებს მოუწოდეს, შემთხვევის ადგილს მოერიდონ.
NBC News-ის წყაროების ინფორმაციით, პოლიცია ვარაუდობს, რომ თავდამსხმელმა თავი სპორტულ დარბაზს შეაფარა და იქ ჩაიკეტა.
ინციდენტის ადგილზე გამოძიებაში ფედერალური საგამოძიებო ბიუროსა და ცეცხლსასროლი იარაღის, თამბაქოს, ალკოჰოლისა და ასაფეთქებელი ნივთიერებების ბიუროს თანამშრომლებიც მონაწილეობენ.
ინფორმაცია შემთხვევის მიზეზისა და დაშავებულთა მდგომარეობის შესახებ ჯერჯერობით უცნობია.
