უკრაინის ომბუდსმენის, დმიტრო ლუბინეცის განცხადებით, ხერსონის ოლქში, დროებით ოკუპირებული ქალაქ ოლეშკის რაიონში, 27 ოქტომბრის ღამის 3 საათიდან ცეცხლის შეწყვეტის რეჟიმი ამოქმედდა. ცეცხლის შეწყვეტის შესახებ ინფორმაცია რუსეთის თავდაცვის სამინისტრომაც დაადასტურა.
ლუბინეცის თქმით, კიევის დროით 27 ოქტომბრის 3:00 საათზე, ხოლო მოსკოვის დროით 4:00 საათზე, ჰუმანიტარული მისიის განხორციელებასთან დაკავშირებულ კონკრეტულ ტერიტორიებზე ცეცხლის შეწყვეტის რეჟიმი ამოქმედდა.
„მხარეები იცავენ შეთანხმებებს, რომლებსაც მივაღწიეთ, როგორც მოლაპარაკებების ჯგუფების ხელმძღვანელებმა, რუსეთის ადამიანის უფლებათა რწმუნებულ იან ლანტრატოვასთან ერთად“, - განაცხადა უკრაინის ომბუდსმენმა.
მისი განმარტებით, ცეცხლის შეწყვეტა ჰუმანიტარული მისიის ფარგლებში ხორციელდება. მისიას უკრაინა იან ლანტრატოვასთან ერთად, აშშ-ის პირველი ლედის, მელანია ტრამპის შუამავლობითა და კოორდინაციით ატარებს.
რუსეთის თავდაცვის სამინისტრომაც დაადასტურა ცეცხლის შეწყვეტის რეჟიმის ამოქმედება.
„ხერსონის ოლქის დასახლება ოლეშკის რაიონში ჰუმანიტარული ოპერაციის მომზადებასთან დაკავშირებით, რუსეთის შეიარაღებულმა ძალებმა ხერსონის მიმართულებით ცეცხლი შეწყვიტეს და 2026 წლის 27 ოქტომბერს, მოსკოვის დროით 4:00 საათიდან, „სიჩუმის რეჟიმი“ დააწესეს“, - ნათქვამია რუსეთის თავდაცვის სამინისტროს განცხადებაში.
მანამდე თეთრმა სახლმა განაცხადა, რომ ამერიკის პირველი ლედის, მელანია ტრამპოს ძალისხმევით, რუსეთსა და უკრაინას შორის ცეცხლის შეწყვეტის შეთანხმება შედგა რუსეთის მიერ დროებით ოკუპირებულ ქალაქ ოლეშკიში, რომელიც ამჟამად ჰუმანიტარული კატასტროფის წინაშე დგას.
რის შემდეგაც უკრაინისა და რუსეთის გენერალურმა შტაბებმა განაცხადეს, რომ 27 ოქტომბრის ღამიდან ოლეშკიში ჰუმანიტარული ოპერაციის ჩასატარებლად, კონკრეტულ ტერიტორიაზე ცეცხლის შეწყვეტის რეჟიმი ამოქმედდებოდა.
