უკრაინის პრეზიდენტმა ვოლოდიმირ ზელენსკიმ ესტონეთის ახლად არჩეულ პრეზიდენტს, იულე მადიზეს, თანამდებობის დაკავება მიულოცა და უკრაინის მხარდაჭერის საკითხები განიხილა.
ამის შესახებ ზელენსკიმ სოციალურ ქსელ X-ზე დაწერა.
პრეზიდენტებმა ისაუბრეს უკრაინის, აშშ-ისა და რუსეთის მონაწილეობით დაგეგმილი სამმხრივი მოლაპარაკებების მნიშვნელობაზე, რომლებიც უკვე ნოემბერში უნდა დაიწყოს. ასევე განიხილეს რუსეთის წინააღმდეგ ომში უკრაინის დახმარება, განსაკუთრებით ენერგეტიკის სფეროში.
„ჩვენ ასევე განვიხილეთ რუსეთის დარტყმების შედეგები, განსაკუთრებით ჩვენი ენერგეტიკული ინფრასტრუქტურისა და რკინიგზის მიმართულებით. რუსეთი განზრახ ცდილობს ჩვენი ლოკომოტივების განადგურებას, ამიტომ ნებისმიერი დახმარება, რომელიც ამ ტიპის მოძრავი შემადგენლობის გაზრდაში დაგვეხმარება, ძალიან მნიშვნელოვანი იქნება“, - წერს ზელენსკი.
უკრაინის პრეზიდენტის განცხადებით, იულე მადიზემ დაადასტურა, რომ ესტონეთი უკრაინის მხარდაჭერას გააგრძელებს.
„მადლობელი ვარ ძალიან საჭირო და სწორი გზავნილებისთვის - ესტონეთის მხარდაჭერა ყველა სფეროში გაგრძელდება. ესტონეთი ასევე ყურადღებით აკვირდება დიპლომატიურ ძალისხმევას, რომელიც მშვიდობის მიღწევას ისახავს მიზნად“, - აღნიშნა ზელენსკიმ.
იულე მადიზემ პრეზიდენტის ფიცი ესტონეთის პარლამენტის წინაშე 12 ოქტომბერს დადო და მოვალეობის შესრულებას ოფიციალურად შეუდგა.
მადიზე პრეზიდენტობის კანდიდატად 75-მა დეპუტატმა წარადგინა. ფარული კენჭისყრის შედეგად ის ესტონეთის პრეზიდენტად 71 ხმით აირჩიეს.
