უკრაინა უკვე თითქმის ერთი თვეა ელოდება აშშ-ის თავდაცვის მდივნის, პიტ ჰეგსეთის ხელმოწერას Patriot-ისა და NASAMS-ის საჰაერო თავდაცვის სისტემებისთვის განკუთვნილი რაკეტების საკითხზე. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
„კერძოდ, უკვე თითქმის ერთი თვეა, ბატონი ჰეგსეთის ხელმოწერას ველოდებით Patriot-ისა და NASAMS-ის რაკეტებთან დაკავშირებით. დავავალე, ეს საკითხი ამერიკულ მხარესთან კიდევ ერთხელ განიხილონ. მოლაპარაკებები სხვა ქვეყნებთანაც გრძელდება“, - განაცხადა ზელენსკიმ.
უკრაინის პრეზიდენტის ინფორმაციით, მან პარტნიორებისგან იარაღის მიწოდებისა და რუსეთის დარტყმების შედეგად დაზიანებული ენერგეტიკული ინფრასტრუქტურის აღდგენის საკითხებზე სამუშაო თათბირი გამართა.
უკრაინის თავდაცვის მინისტრმა, შეიარაღებული ძალების მთავარსარდალმა და საგარეო საქმეთა მინისტრმა პრეზიდენტს უკრაინის საჰაერო თავდაცვისთვის განკუთვნილი ჩამჭრელი რაკეტების მიწოდების შესახებ ინფორმაცია მიაწოდეს. ზელენსკის თქმით, უკრაინა თანამშრომლობს აშშ-სთან, ევროპულ ქვეყნებთან და სხვა პარტნიორებთან, რომლებსაც PAC-2-ისა და PAC-3-ის ტიპის რაკეტების მარაგები აქვთ.
თათბირზე ასევე განიხილეს ნოემბერში დაგეგმილი „რამშტაინის“ ფორმატის შეხვედრისთვის მზადება. ზელენსკიმ ხაზი გაუსვა უკვე მიღებული გადაწყვეტილებების შესრულების დაჩქარების აუცილებლობას.
„მხარდაჭერის თითოეული პაკეტი ადამიანების სიცოცხლის დაცვის შესაძლებლობაა“, - აღნიშნა უკრაინის პრეზიდენტმა.
