ნორვეგიის საგარეო საქმეთა მინისტრი ესპენ ბარტ ეიდე აშშ-ის პრეზიდენტ დონალდ ტრამპის განცხადებებს გამოეხმაურა. ტრამპმა ნორვეგია მას შემდეგ გააკრიტიკა, რაც მშვიდობის დარგში ნობელის პრემია ვერ მიიღო.
ეიდემ აღნიშნა, რომ ტრამპისთვის კარგად არის ცნობილი ნობელის კომიტეტის დამოუკიდებლობის შესახებ.
„მან ძალიან კარგად იცის, რომ ნობელის კომიტეტი დამოუკიდებელია. ეს არაერთხელ შეგვახსენებია მათთვის, ვისაც ამაში ეჭვი ეპარება, და ასეა დღემდე“, - განაცხადა ნორვეგიის საგარეო საქმეთა მინისტრმა.
ეიდემ ასევე აღნიშნა, რომ ტრამპის ყოველდღიური განცხადებების კომენტირებას დიდ დროს არ დაუთმობს, რადგან აშშ-ში საარჩევნო კამპანია მიმდინარეობს.
„ტრამპს საკუთარი სტილი აქვს. ახლა ის საარჩევნო კამპანიის შუაგულშიცაა, რომელიც, შესაძლოა, მისი პარტიისთვის არც ისე კარგად მიმდინარეობდეს, ამიტომ ბევრ რამეს ამბობს. თუმცა ჩვენთვის მნიშვნელოვანია აშშ-სთან ხანგრძლივი ურთიერთობა და ჩვენი საგარეო პოლიტიკა მყარად დგას“, - განაცხადა ნორვეგიის საგარეო საქმეთა მინისტრმა
კვირას, საარჩევნო ღონისძიებაზე გამოსვლისას, ტრამპმა ნორვეგიის ხელისუფლება ნობელის პრემიის ვერმიღების გამო გააკრიტიკა და ქვეყანას „ნაგავი ქვეყანა“ უწოდა.
