უკრაინის საგარეო საქმეთა მინისტრის, ანდრი სიბიჰას განცხადებით, რუსეთი სერიოზულ სამშვიდობო მოლაპარაკებებს არ დათანხმდება, ვიდრე იმედი ექნება, რომ უკრაინაზე ზეწოლით ომის მიზნების მიღწევას შეძლებს.
„ვიდრე რუსეთს ექნება იმედი, რომ უკრაინაზე ზეწოლით და მისი კაპიტულაციის იძულებით მიაღწევს შეჭრის მიზნებს, რომლებსაც ბრძოლის ველზე ვერ აღწევს, ის სერიოზული სამშვიდობო მოლაპარაკებებისთვის მზად არ იქნება“, - განაცხადა სიბიჰამ.
მისი თქმით, ომის დასრულებისთვის კრიტიკულად მნიშვნელოვანია რუსეთის წინააღმდეგ ზეწოლის შენარჩუნება და გაძლიერება.
„ძალის მეშვეობით მშვიდობა ერთადერთი სტრატეგიაა, რომელიც მუშაობს. თუმცა, ეს ძალა აგრესორის წინააღმდეგ უნდა იყოს მიმართული და არა იმ ქვეყნის წინააღმდეგ, რომელიც თავს იცავს. ამ ომის დასრულება უკრაინის წინააღმდეგობის შეწყვეტით შეუძლებელია. ომის დასრულება მხოლოდ აგრესორის თავდასხმების შეწყვეტით არის შესაძლებელი“, - აღნიშნა უკრაინის საგარეო საქმეთა მინისტრმა.
