უკრაინის პრეზიდენტი ვოლოდიმირ ზელენსკი იმედოვნებს, რომ რუსეთის მიერ ოკუპირებულ ხერსონის ოლქის ქალაქ ოლეშკიში ჰუმანიტარული დახმარების შეტანისა და ქალაქზე წვდომის აღდგენის საკითხში აშშ-ის შუამავლობა შედეგს გამოიღებს. თუმცა, მისი თქმით, ვითარება კვლავ რთულია, რადგან რუსულმა ძალებმა გზები დანაღმეს.
ზელენსკის განცხადებით, ოლეშკის მიმართულებით წვდომის აღდგენის შესახებ შეთანხმება მიღწეულია და მისი განხორციელება მალე უნდა დაიწყოს.
„ოლეშკის საკითხზეც არსებობს შეთანხმება. მალე მისი განხორციელება უნდა დაიწყოს, რათა ოლეშკიზე წვდომა აღდგეს. ჩვენი ხერსონის ოლქის დროებით ოკუპირებულ ნაწილში რუსებმა გზები დანაღმეს, რის გამოც ვითარება რთულია, უკიდურესად რთული“, - განაცხადა ზელენსკიმ.
პრეზიდენტის თქმით, უკრაინა იმედოვნებს, რომ ჰუმანიტარული ოპერაციის ჩატარება და ოლეშკიზე წვდომის აღდგენა შესაძლებელი გახდება. ეს მოსახლეობისთვის საკვების, მედიკამენტებისა და სხვა აუცილებელი დახმარების მიწოდებას, ასევე, საბრძოლო მოქმედებების ზონიდან ადამიანების გასვლას უზრუნველყოფს.
„ამ საკითხზე გარკვეული დროის განმავლობაში, სხვადასხვა დონეზე ვმუშაობდით. უკრაინა თავის ვალდებულებებს შეასრულებს. ვიმედოვნებთ, რომ აშშ-ის შუამავლობა შედეგს გამოიღებს“, - აღნიშნა ზელენსკიმ.
უკრაინისა და რუსეთის გენერალურმა შტაბებმა პარასკევს, 23 ოქტომბერს, საღამოს განაცხადეს, რომ 27 ოქტომბრის ღამიდან ოლეშკის დროებით ოკუპირებულ ტერიტორიაზე ჰუმანიტარული ოპერაციის ჩასატარებლად კონკრეტულ მონაკვეთზე ცეცხლის შეწყვეტის რეჟიმი ამოქმედდება.
