ამერიკელი მილიარდერი, კომპანია SpaceX-ის დამფუძნებელი ილონ მასკი უკრაინისთვის მნიშვნელოვანი სამხედრო საკომუნიკაციო სისტემის, Starlink-ის სამხედრო ვერსიის მუშაობის შეზღუდვის ინიციატორი იყო. ამის შესახებ The Wall Street Journal ამერიკელ ოფიციალურ პირებსა და სხვა წყაროებზე დაყრდნობით წერს.
გამოცემის ცნობით, მასკი Starlink-ის თანამგზავრული ინტერნეტსისტემის მუშაობის შენელებას დათანხმდა. სისტემა დედამიწის ორბიტაზე მოძრავი ათასობით თანამგზავრის მეშვეობით უზრუნველყოფს ინტერნეტთან წვდომას.
ინფორმაციის გასაჯაროებიდან მალევე მასკმა და აშშ-ის პრეზიდენტმა დონალდ ტრამპმა Starlink-თან დაკავშირებული გადაწყვეტილება ტელეფონით განიხილეს.
ზოგიერთი ამერიკელი ოფიციალური პირის მტკიცებით, მასკი დამოუკიდებლად მოქმედებდა და ტრამპს უკრაინის დასასჯელად კონკრეტული ბრძანება არ გაუცია.
ერთ-ერთმა წყარომ განაცხადა, რომ სიჩქარის ახალი შეზღუდვის დაწესებამდე მასკი აშშ-ის ადმინისტრაციის რამდენიმე მაღალჩინოსანს, მათ შორის პირადად დონალდ ტრამპს, ესაუბრა.
SpaceX-ის დამფუძნებელმა შეზღუდა სიჩქარე, რომლითაც უკრაინულ მოწყობილობებს თანამგზავრულ ქსელთან კავშირის შენარჩუნება შეეძლოთ. შედეგად, ზოგიერთი საბრძოლო დრონი და მტრის დრონების ჩამოსაგდებად გამოყენებული უპილოტო საფრენი აპარატი პრაქტიკულად გამოუსადეგარი გახდა.
ამერიკელი ოფიციალური პირებისა და საქმის დეტალების მცოდნე წყაროების ცნობით, ამან კიევში პანიკა, ტრამპის ადმინისტრაციაში კი დაბნეულობა გამოიწვია.
გამოცემის ინფორმაციით, მასკმაც და აშშ-ის პრეზიდენტმა დონალდ ტრამპმაც უკმაყოფილება გამოხატეს უკრაინის მიმართ იმის გამო, რომ ბოლო რამდენიმე კვირის განმავლობაში უკრაინა რუსეთის ნავთობგადამამუშავებელ ქარხნებზე თავდასხმებს ახორციელებდა.
თეთრი სახლის ხელმძღვანელის მტკიცებით, ამ თავდასხმების გამო ენერგომატარებლებზე ფასები ზედმეტად მაღალია.
