ევროპული საბჭოს პრეზიდენტმა ანტონიო კოშტამ განაცხადა, რომ ევროკავშირის ორდღიანი სამიტის დასრულების შემდეგ უკრაინა ევროპისთვის კვლავ პრიორიტეტად რჩება.
ამის შესახებ მან ევროკომისიის პრეზიდენტ ურსულა ფონ დერ ლაიენთან ერთად გამართულ პრესკონფერენციაზე განაცხადა.
კოშტამ ხაზგასმით აღნიშნა, რომ უკრაინის საკითხი ევროპისთვის კვლავ პრიორიტეტულია.
„უკრაინისა და მისი ხალხის მხარდაჭერის ჩვენი გადაწყვეტილება ისეთივე მტკიცეა, როგორც ადრე. ამასთან, მშვიდობისკენ გადადგმულ თითოეულ რეალურ ნაბიჯს მნიშვნელობა აქვს და ამ მიმართულებით ყველა გულწრფელ ძალისხმევას მხარს ვუჭერთ. სამწუხაროდ, რუსეთის ქმედებები საპირისპიროზე მიუთითებს“, - განაცხადა მან.
კოშტამ მოუწოდა ევროპას, რუსეთზე ზეწოლა გააძლიეროს და არ შეასუსტოს. მან ასევე უკრაინისთვის ფინანსური დახმარების გაზრდის აუცილებლობაზე ისაუბრა.
„უკრაინის მხარდაჭერა არასდროს ყოფილა ისე მტკიცე, როგორც ახლა, როდესაც მოსკოვი ჰიბრიდულ კამპანიებს მთელ ევროპაში აძლიერებს. ჩვენ ვხედავთ დივერსიულ აქტებს, ასევე ევროკავშირის წევრი ქვეყნების საჰაერო სივრცისა და ტერიტორიული წყლების არაერთგზის დარღვევას“, - აღნიშნა ევროპული საბჭოს პრეზიდენტმა.
