16 ოქტომბერს რომის პაპმა ლეო XIV-მ რუსეთის პრეზიდენტ ვლადიმირ პუტინთან სატელეფონო საუბარი გამართა და ხერსონის ოლქში, დროებით ოკუპირებულ ქალაქ ოლეშკიში ჰუმანიტარული დახმარების შესატანად ცეცხლის შეწყვეტის ორგანიზება სთხოვა.
ამის შესახებ წმინდა საყდრის პრესსამსახურზე დაყრდნობით Vatican News იუწყება.
უწყების ცნობით, საუბრისას პაპმა ღრმა შეშფოთება გამოთქვა ოლეშკიში შექმნილი მძიმე ჰუმანიტარული ვითარების გამო. მან პუტინს ცეცხლის შეწყვეტისკენ მოუწოდა, რათა ქალაქში საკვებისა და მედიკამენტების შეტანა, ასევე მშვიდობიანი მოსახლეობის ნებაყოფლობითი და უსაფრთხო ევაკუაცია შესაძლებელი გახდეს.
„საუბრისას წმინდა მამამ ღრმა შეშფოთება გამოხატა ხერსონის ოლქის ქალაქ ოლეშკიში არსებული მძიმე ჰუმანიტარული ვითარების გამო და ცეცხლის შეწყვეტა ითხოვა, რათა შესაძლებელი გახდეს საკვებისა და სამედიცინო დახმარების მიწოდება, ასევე მშვიდობიანი მოსახლეობის ნებაყოფლობითი და უსაფრთხო ევაკუაცია“, - ნათქვამია წმინდა საყდრის განცხადებაში.
რუსული სახელმწიფო საინფორმაციო სააგენტოების ცნობით, საუბრისას პუტინმა ჰუმანიტარულ კატასტროფაზე პასუხისმგებლობა უკრაინას დააკისრა.
ამასთან, რუსული მხარის ცნობით, პუტინმა მხარი დაუჭირა ვატიკანის განზრახვას, ხელი შეუწყოს ქალაქის მოსახლეობის უსაფრთხოების უზრუნველყოფისა და სასიცოცხლოდ მნიშვნელოვანი დახმარების მიწოდებისთვის აუცილებელი პირობების შექმნას.
