საქართველოს პარლამენტი ჩერქეზების გენოციდის აღიარების საკითხზე მუშაობას იწყებს. თუმცა, როგორც დიაპორისა და კავკასიის საკითხებში საპარლამენტო კომიტეტის თავმჯდომარე ნუგზარ წიკლაურმა კომიტეტის დღევანდელ სხდომაზე განაცხადა, ვიდრე აღნიშნულის პოლიტიკური გადაწყვეტილება იქნება მიღებული, შესაბამისი მასალების შესწავლა და იურდიული მხარის მომზადება მოხდება.
"ჩერქეზების გენოციდის აღიარების საქმეში ახალი გარემოება გაჩნდა. თუ აქამდე ლაპარაკი იყო იმაზე, რომ ამასთან დაკავშირებით არანაირი საკანონმდებლო აქტი არ არსებობს და საქართველო რატომ უნდა იყოს პირველი, რომელიც ამ გენოციდს აღიარებს, აღმონდა, რომ როგორც ადიგეს, ისე ყაბალდო-ბალყარეთის პარლამენტებს შესაბამისი დოკუმენტები 1992 წელს უკვე მიღებული აქვთ. ასე რომ, საქართველოს გადაწყვეტილება ჩერქეზების გენოციდთან დაკავშირებით, რა თქმა უნდა, თუკი ასეთ გადაწყვეტილებას მივიღებთ, იქნება შეერთება ამ ხალხის პარლამენტების მიერ გამოცხადებულ და მიღებულ გადაწყვეტილებებთან", - განმარტა წიკლაურმა.
მისივე განმარტებით, პოლიტიკური გადაწყვეტილების მიღებამდე პარლამენტმა ჩერქეზების გენოციდის სისტემატიზაციის საკითხზე უნდა დაიწყოს მუშაობა.
"ყველა იმ მასალას, რომელიც საკმაოდ ვრცელია, სჭირდება შესწავლა. საჭიროა ამ ყველაფრის სისტემატიზაცია, შესაბამისი იურიდიული სახის მიღება. პოლიტიკური გადაწყვეტილების მიღებამდე იურიდიული მხარე რაფინირებული და დახვეწილი უნდა იყოს", - დასძინა ნუგზარ წიკლაურმა.
