ოპოზიციონერი პოლიტიკოსები ავრცელებენ ინფორმაციას, რომ ოპოზიციური პარტიების აკრძალვის თაობაზე მომზადებული საკონსტიტუციო სარჩელის განხილვის პროცესები 21 ოქტომბრიდან ჩაინიშნა. 

 „ლელო-ძლიერი საქართველოს“ ერთ-ერთი ლიდერი, ირაკლი კუპრაძე აცხადებს, რომ დაუკავშირდნენ საკონსტიტუციო სასამართლოდან და შეატყობინეს, რომ პარტიების აკრძალვასთან დაკავშირებული პროცესები 21-22-23 ოქტომბერს ჩაინიშნა.

ირაკლი კუპრაძის შეფასებით, საკონსტიტუციო სასამართლოში პროცესები ფორსირებულად ჩაინიშნა.

„დამირეკეს საკონსტიტუციო სასამართლოდან, პარტიების აკრძალვის პროცესები ჩანიშნეს ფორსირებულად - 21 ოქტომბერი, 22 ოქტომბერი, 23 ოქტომბერი. მონდომებაც ამას ჰქვია“, - წერს ირაკლი კუპრაძე სოციალურ ქსელში.

საკონსტიტუციო სასამართლოდან დაუკავშირდნენ „გახარია საქართველოსთვის“ პარტიის ლიდერს, ბერდია სიჭინავასაც.

„საკონსტიტუციო სასამართლოდან დამირეკეს, 21, 22, 23 ოქტომბერს მობრძანდით, თქვენი აკრძალვის პროცესზეო… მეთქი ქალბატონო, ან სარჩელი გადმოგზავნეთ ოფიციალურად, ან ჩვენს პოზიციას დაელოდეთ წერილობით… არ გვჭირდება, ბატონო ეგენიო.

ბოლოს მეუბნება, ნაცმოძრაობის ან/და ფედერალისტებსაც ხომ ვერ დამაკავშირებო, მეთქი ქალბატონო, თქვენ მართლა კოლექტიური ნაცმოძრაობა ხო არ გგონივართ-მეთქი? წადით და ვასილ როინიშვილს ჰკითხეთ “ნაცმოძრაობის” საკონტაქოთქო. მგონი უჩემოდაც გავლენ კონტაქტზე”, - წერს ბერდია სიჭინავა.

შესაბამის ინფორმაციას ავრცელებს "კოალიცია ცვლილებისთვის" ერთ-ერთი ლიდერუ, თენგო კირთაძეც.

"დამირეკეს საკონსტიტუციო სასამართლოდან, ჩაინიშნა სხდომები “კოალიცია ცვლილებისთვის გვარამია მელია გირჩი დროას” აკრძალვასთან დაკავშირებით", - აღნიშნავს კირთაძე.