საფრანგეთის განათლების მინისტრის, ედუარ ჟეფრეს განცხადებით, ქვეყანაში უფროსკლასელთა საპროტესტო აქციების დაწყებიდან დღემდე 190 მოსწავლე დაშავდა. ინფორმაციას Le Figaro ავრცელებს.
მინისტრის თქმით, მოსწავლეები როგორც შემთხვევითი გარემოებების, ისე წესრიგის დამრღვევთა მიერ მიყენებული დაზიანებების შედეგად დაშავდნენ.
ჟეფრემ რამდენიმე უფროსკლასელთან შეხვედრის შემდეგ განაცხადა, რომ ისინი „შოკირებული იყვნენ მათ სკოლებთან უცხო პირების მიერ ჩადენილი ძალადობით“.
„ესენი იყვნენ ახალგაზრდები, რომლებსაც ისინი არ იცნობდნენ და რომლებიც ჯგუფებად მოდიოდნენ და პიროტექნიკას ისროდნენ", - განაცხადა მინისტრმა.
მოსწავლეთა საპროტესტო აქციებისა და სკოლების ბლოკირების მოძრაობა 17 სექტემბერს ილ-დე-ფრანსის რეგიონში დაიწყო და თანდათან საფრანგეთის სხვა ქალაქებშიც გავრცელდა. აქციებში მონაწილე მოსწავლეები ეროვნული განათლების სისტემისთვის ადამიანური და ფინანსური რესურსების გაზრდას ითხოვენ. ისინი ასევე უკმაყოფილებას გამოთქვამენ მასწავლებლების შემცვლელების არარსებობის, სკოლების შენობების მდგომარეობისა და გადატვირთული სასწავლო განრიგის გამო.
პარასკევს სამართალდამცველებმა 1 700-ზე მეტი ადამიანი დააკავეს. ორშაბათიდან დაკავებულთა საერთო რაოდენობამ დაახლოებით 5 000-ს მიაღწია.
სტუდენტურმა ორგანიზაციებმა პარასკევს საპროტესტო მოძრაობის გაგრძელებისკენ მოუწოდეს და „მესამე აქცია“ 6 ოქტომბერს, სამშაბათს, დააანონსეს. განათლების მინისტრთან შეხვედრის შემდეგ მათ უკმაყოფილება გამოთქვეს და განაცხადეს, რომ კონკრეტული ზომები არ ყოფილა მიღებული.
გასულ კვირაში საფრანგეთში საპროტესტო აქციების ფონზე 24 სკოლა დაარბიეს.
