უკრაინის საგარეო საქმეთა მინისტრმა ანდრიი სიბიჰამ მადლობა გადაუხადა უცხოური დიპლომატიური წარმომადგენლობების თანამშრომლებს, რომლებიც კიევში რუსეთის დაბომბვებისა და მუქარის მიუხედავად მუშაობას აგრძელებენ.
ამის შესახებ სიბიჰამ სოციალურ ქსელ X-ზე დაწერა.
მისი თქმით, რუსეთის მიერ დიპლომატების დაშინების კამპანია ექვსი თვის წინ ჩავარდა და ახლა ის კვლავ მარცხდება.
"ადამიანს შეუძლია უსასრულოდ უყუროს სამ რამეს: ცეცხლის ალს, წყლის დინებას და იმას, როგორ ცდილობენ რუსი კრიმინალები კიევში დიპლომატიური კორპუსის დაშინებას.
ეს კამპანია ექვსი თვის წინ ჩავარდა და ახლაც კვლავ მარცხით დასრულდება.
მადლობას ვუხდით ყველა ჩვენს უცხოელ კოლეგას, რომლებიც ამ რთულ პერიოდში უკრაინაში რჩებიან, მუშაობენ და რუსეთის დაშინებას არ ემორჩილებიან", - წერ სიბიჰა.
ანდრი სიბიჰამ ასევე მოუწოდა მოკავშირეებს, გააძლიერონ უკრაინის საჰაერო თავდაცვა, დააწესონ ეფექტიანი სანქციები რუსეთის სამხედრო-სამრეწველო კომპლექსის წინააღმდეგ და სანქცირებულთა სიებში შეიყვანონ აგრესორი სახელმწიფოს დანაშაულებში ჩართული პირები და ორგანიზაციები.
შეგახსენებთ, რუსეთის საგარეო საქმეთა სამინისტრომ კიდევ ერთხელ მოუწოდა კიევში მომუშავე დიპლომატებს, დატოვონ უკრაინის დედაქალაქი და განაცხადა, რომ „გაფრთხილების გაუთვალისწინებლობის შემთხვევაში, შედეგებზე პასუხისმგებლობა მათ დაეკისრებათ“.
მოგვიანებით, ევროკომისიაში განაცხადეს, რომ კიევში უცხოელი დიპლომატების მიმართ მუქარით მოსკოვი ცდილობს, ევროპა დააშინოს, რათა მან უკრაინის მხარდაჭერა შეწყვიტოს, თუმცა მათივე განცხადებით, ეს ასე არ მოხდება.
