უკრაინის პრეზიდენტის, ვოლოდიმირ ზელენსკის განცხადებით, უკრაინის თავდაცვის ძალებმა ბოლო 24 საათში რუსეთის სამარისა და ვოლგოგრადის ოლქებში ნავთობობიექტებს დაარტყეს.
„ამ 24 საათის განმავლობაში დაზიანდა ნავთობობიექტები სამარისა და ვოლგოგრადის რეგიონებში. ასევე შედეგიანი ოპერაციები ჩატარდა შავ ზღვაში, ვორონეჟის, ნიჟნი ნოვგოროდის, ვოლგოგრადის, სამარისა და კრასნოდარის რეგიონებში - აეროდრომების, საწარმოების, ნავთობგადამამუშავებელი ქარხნების, სარაკეტო-კოსმოსური ცენტრისა და ოკუპანტების საბრძოლო მასალების საწყობის წინააღმდეგ“, - წერს ზელენსკი.
ზელენსკიმ უკრაინის უსაფრთხოების სამსახურის, სამხედრო დაზვერვის, უპილოტო სისტემების ძალების, სპეციალური ოპერაციების ძალებისა და საგარეო დაზვერვის სამსახურის სამხედროებს „სიზუსტისა და პროფესიონალიზმისთვის“ მადლობა გადაუხადა.
უკრაინის გენერალური შტაბის ინფორმაციით, 2 ოქტომბრის ღამეს დარტყმა განხორციელდა ვოლგოგრადის ნავთობგადამამუშავებელ ქარხანაზე, სადაც აფეთქებები და ხანძარი დაფიქსირდა. ასევე დაზიანდა სამარის საწარმოო-სადისპეტჩერო სადგური, რომლის ტერიტორიაზეც ხანძარი გაჩნდა.
რუსეთის ხელისუფლებას ვოლგოგრადის ნავთობგადამამუშავებელ ქარხანაზე დარტყმის შესახებ ოფიციალური განცხადება არ გაუკეთებია. ოლქის გუბერნატორმა ანდრეი ბოჩაროვმა მხოლოდ რეგიონზე „სამრეწველო ინფრასტრუქტურის“ წინააღმდეგ მასშტაბური დრონებით თავდასხმის შესახებ განაცხადა და აღნიშნა, რომ ვოლგოგრადში საცხოვრებელ სახლში ხანძარი გაჩნდა და ერთი ადამიანი დაშავდა.
გერმანული Deutsche Welle-ს ცნობით, დარტყმის სავარაუდო სამიზნე ვოლგოგრადის ნავთობგადამამუშავებელი ქარხანა იყო.
