უკრაინამ FP-7 ტიპის ტაქტიკური ბალისტიკური რაკეტა საბრძოლო მოქმედებაში პირველად გამოიყენა. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
ზელენსკიმ ასევე გამოაქვეყნა ვიდეო, რომელშიც, მისი თქმით, რაკეტის პირველი საბრძოლო გამოყენებაა ასახული.
„უკრაინული ტაქტიკური ბალისტიკა. FP-7. პირველი საბრძოლო გამოყენება. მადლობა შედეგისთვის. შემდეგი ეტაპი - წარმოება. დიდება უკრაინას!“ - დაწერა ზელენსკიმ.
უკარინის პრეზიდენტს რაკეტის გამოყენების ადგილი, სამიზნე ან დარტყმის შედეგები არ დაუკონკრეტებია.
FP-7-ის მოქმედების მაქსიმალური რადიუსი 250 კილომეტრია, ხოლო ქობინის მასა დაახლოებით 200 კილოგრამს შეადგენს. რაკეტას შეუძლია 60 კილომეტრამდე სიმაღლეზე ფრენა და საათში დაახლოებით 5 400 კილომეტრის სიჩქარის განვითარება.
მისი წრიული გადახრის მაჩვენებელი დაახლოებით 14 მეტრია, ფრენის მაქსიმალური ხანგრძლივობა კი 250 წამს შეადგენს. რაკეტის გაშვება სახმელეთო პლატფორმიდან არის შესაძლებელი და ის საშუალო მანძილზე მდებარე სამიზნეების ოპერატიული განადგურებისთვისაა განკუთვნილი.
FP-7 უკრაინულმა კომპანია Fire Point-მა შეიმუშავა.
უკრაინული მედიის ცნობით, FP-7-ის ბალისტიკური რაკეტების პირველი გამოცდა მიმდინარე წლის თებერვალში ჩატარდა.
