რუსულმა უპილოტო საფრენმა აპარატმა კიევში ბირთვული კვლევების ინსტიტუტის ტერიტორიას დაარტყა, სადაც კიევის კვლევითი რეაქტორი (ВВР-М) მდებარეობს. ინფორმაციას უკრაინის ბირთვული რეგულირების სახელმწიფო ინსპექცია ავრცელებს. იუწყება უკრაინული მედია.
უწყების ცნობით, თავდასხმის შედეგად ხანძარი გაჩნდა, თუმცა მისი ოპერატიულად ლიკვიდირება მოხერხდა. შემთხვევის შედეგად არავინ დაშავებულა. ინციდენტის შედეგად მიყენებული ზიანის შეფასება და გამოძიება გრძელდება.
ინსტიტუტის ინფორმაციით, თავად კვლევითი რეაქტორი და უსაფრთხოებისთვის მნიშვნელოვანი სისტემები არ დაზიანებულა. ასევე, რადიაციული ფონის ცვლილება არ დაფიქსირებულა - მაჩვენებლები ბუნებრივი ფონის ფარგლებში, 0,16–0,20 მიკროსივერტი საათში, რჩება.
მეცნიერების განცხადებით, რადიაციული რისკების შემცირების მიზნით, რეაქტორი 2022 წლის თებერვლიდან გაჩერებულია და მისი აქტიური ზონა სრულად არის განტვირთული. ამჟამად რეაქტორზე მხოლოდ უსაფრთხოებისთვის მნიშვნელოვანი სისტემების რეგლამენტით გათვალისწინებული ტექნიკური მომსახურება მიმდინარეობს.
უკრაინის ბირთვული რეგულირების სახელმწიფო ინსპექციამ შემთხვევა „ბირთვულ ტერორად“ შეაფასა.
