უკრაინის საგარეო საქმეთა მინისტრმა ანდრი სიბიჰამ საერთაშორისო საზოგადოებასა და საერთაშორისო ორგანიზაციებს რუსეთის მიმართ ზეწოლის გაძლიერებისკენ მოუწოდა, რათა ოკუპირებული ოლეშკის ბლოკადა დასრულდეს.
სიბიჰას განცხადებით, უკრაინის შეიარაღებული ძალები ქალაქში მცხოვრები ადამიანების დასახმარებლად ყველა შესაძლო ზომას მიმართავენ, მათ შორის, დრონების საშუალებით ჰუმანიტარულ დახმარებას აწვდიან.
უკრაინის საგარეო საქმეთა მინისტრის თქმით, რუსეთი ოლეშკიში არსებული ვითარების შესახებ პროპაგანდისტული კამპანიის მომზადებას გეგმავს.
სიბიჰა საერთაშორისო პარტნიორებს მოუწოდენს ოლეშკიში მოსახლეობისთვის ჰუმანიტარული წვდომის უზრუნველყოფის მოთხოვნით დაუყოვნებლივ იმოქმედონ.
"რუსულ ცინიზმს საზღვარი არ აქვს. ისინი ჯერ ქალაქი იკავებენ, მშვიდობიან მოსახლეობის გასასვლელებს უკეტავენ და ჰუმანიტარულ დახმარებას ბლოკავენ. შემდეგ კი ადგილობრივ მოსახლეობას დადგმულ პროპაგანდისტულ ვიდეოებში მონაწილეობას აიძულებენ.
ეს არის რამდენიმე კვირის განმავლობაში მიმდინარე ამაზრზენი რუსული პროპაგანდისტული კამპანიის უახლესი ეტაპი, რომლის მიზანიც ოლეშკიში არსებული ნებისმიერი პრობლემის უარყოფა და იმის მტკიცებაა, რომ იქ ჰუმანიტარული კატასტროფა არ ხდება.
მოვუწოდებთ საერთაშორისო საზოგადოებასა და ყველა შესაბამის საერთაშორისო ორგანიზაციას, გააძლიერონ ზეწოლა მოსკოვზე და მოითხოვონ, რომ რუსმა ოკუპანტებმა დაუყოვნებლივ შეწყვიტონ ოლეშკის ბლოკადა.
ჩვენი მხრიდან, უკრაინის თავდაცვის ძალები ყველაფერს აკეთებენ ადამიანების დასახმარებლად, მათ შორის, როგორც ამას ახლახან ჰქონდა ადგილი, დრონებით ჰუმანიტარული დახმარების მიწოდებას.
იქ შიმშილისა და სიკვდილის პირას მყოფი ადამიანების გადასარჩენად ყოველი დღე მნიშვნელოვანია.
მოვუწოდებთ ჩვენს საერთაშორისო პარტნიორებს, ახლავე იმოქმედონ და მოითხოვონ დაუყოვნებლივ ჰუმანიტარული წვდომა, რათა ეს კატასტროფა დასრულდეს", - წერს სიბიჰა.
