ესპანეთის მეფე ფელიპე VI აცხადებს, რომ ევროპის ქვეყნებმა მეტი სოლიდარობა უნდა გამოიჩინონ და ესპანეთს უფრო მნიშვნელოვანი მხარდაჭერა აღმოუჩინონ მას შემდეგ, რაც სეუტაში ათობით ათასი მიგრანტი მასობრივად ჩავიდა.
ამის შესახებ ფელიპე VI-მ საფრანგეთის პრეზიდენტ ემანუელ მაკრონის ესპანეთში ვიზიტის ფარგლებში გამართულ საზეიმო ვახშამზე განაცხადა. ინფორმაციას Reuters ავრცელებს.
ესპანეთის მეფემ აღნიშნა, რომ ჩრდილოეთ აფრიკის სანაპიროზე მდებარე ესპანურ ანკლავში განვითარებული მოვლენები „მიუღებელი“ იყო და უსაფრთხოების, წესრიგისა და ჰუმანიტარული დახმარების კუთხით მნიშვნელოვანი პრობლემები შექმნა.
„ამ ვითარებამ წევრ სახელმწიფოებს შორის რესურსებისა და თანამშრომლობის მიმართულებით კოორდინაციის გაძლიერებას უნდა შეუწყოს ხელი“, - განაცხადა ფელიპე VI-მ.
მისი თქმით, ევროკავშირის წევრი ქვეყნები, რომლებიც გარე საზღვრებთან მდებარეობის გამო მიგრაციული ზეწოლის ყველაზე დიდ გავლენას განიცდიან, პასუხისმგებლობას, რომელიც ყველა ქვეყანას ეკისრება, მარტო ვერ იტვირთავენ.
29 სექტემბერს ევროკომისიამ სეუტაში მომხდარ მოვლენებზე რეაგირების მიზნით ევროკავშირში არალეგალური შესვლის უეცარი მასობრივი შემთხვევების პრევენციის, პროგნოზირებისა და მათზე რეაგირების ხუთპუნქტიანი გეგმა წარადგინა.
მანამდე ევროკომისარმა მიგრაციის საკითხებში მაგნუს ბრუნერმა განაცხადა, რომ ივლისის ბოლოს ესპანეთის სეუტაში მიგრანტების მასობრივი ნაკადის ამსახველმა კადრებმა ევროკავშირში მიგრაციის მიმართულებით არსებული დადებითი სტატისტიკური მაჩვენებლები დაჩრდილა.
