საფრანგეთში სკოლის მოსწავლეების საპროტესტო აქციებმა ქვეყნის მასშტაბით დაახლოებით 400 სკოლა მოიცვა. 29 სექტემბერს გამართულ აქციებზე პოლიციამ 440 ადამიანი დააკავა, რომელთა უმეტესობა არასრულწლოვანი იყო. ამის შესახებ ქვეყნის შინაგან საქმეთა მინისტრმა ლორან ნიუნეზმა განაცხადა. ამის შესახებ BFMTV იუწყება
მოსწავლეები საპროტესტო აქციებს მართავენ სკოლებში არსებული პირობების გამო. მათი მოთხოვნები, მათ შორის, უკავშირდება გადატვირთულ კლასებს, მასწავლებლების დეფიციტს, სასწავლო განრიგს და არასათანადო ინფრასტრუქტურას. საპროტესტო მოძრაობა თავდაპირველად პარიზის რეგიონში დაიწყო, თუმცა შემდეგ საფრანგეთის სხვა ქალაქებშიც გავრცელდა.
29 სექტემბერს დაახლოებით 40 სკოლა სრულად იყო ბლიკირებული, კიდევ 44 სკოლაში კი ბლოკირების მოწყობის მცდელობა დაფიქსირდა. რამდენიმე ადგილას დემონსტრანტებმა ნაგვის ურნებს ცეცხლი წაუკიდეს და პოლიციას სხვადასხვა საგანი ესროლეს. სამართალდამცველებმა საპასუხოდ ცრემლსადენი გაზი და ხელკეტები გამოიყენეს.
აქციების დროს დაშავდა 48 სამართალდამცველი, ასევე დაშავდნენ მოსწავლეები და განათლების სფეროს თანამშრომლები. საფრანგეთის განათლების მინისტრმა ედუარ ჟეფრემ აქციების დროს მომხდარ ძალადობას „შეუფერებელი“ უწოდა და განაცხადა, რომ შესაბამისი სამართლებრივი პროცედურები უკვე დაიწყო.
სკოლის მოსწავლეების პროტესტი დაემთხვა საფრანგეთში საჯარო სექტორის თანამშრომლების მასშტაბურ გაფიცვასაც. პროფკავშირები მთავრობის მიერ 2027 წლის ბიუჯეტში დაგეგმილ ხარჯების შემცირებასა და საჯარო მოხელეების ხელფასების გაყინვას აპროტესტებენ.
