30 სექტემბრის ღამეს კიევის ოლქზე რუსეთმა რაკეტებითა და დრონებით მორიგი მასირებული იერიში მიიტანა. თავდასხმას ბავშვი ემსხვერპლა, დაშავდა კიდევ სამი ადამიანი . დაზიანდა და განადგურდა საცხოვრებელი სახლები და ინფრასტრუქტურის ობიექტები. ინფორმაციას უკრაინული მედია ავრცელებს.
კიევის საოლქო სამხედრო ადმინისტრაციის ხელმძღვანელის, ტიმურ ტკაჩენკოს განცხადებით, ვიშჰოროდში მაშველებმა დანგრეული კერძო სახლის ნანგრევებიდან სამი ადამიანი გამოიყვანეს. დაშავებულებს სამედიცინო დახმარება გაუწიეს.
„სამწუხაროდ, ნანგრევებში კიდევ ერთი ბავშვის ცხედარი აღმოაჩინეს. მაშველები მის გამოსაყვანად სამუშაოებს ატარებენ. ეს საშინელი ტრაგედიაა. გულწრფელ სამძიმარს ვუცხადებ ბავშვის ოჯახის წევრებსა და ახლობლებს“, - განაცხადა ტკაჩენკომ.
ვიშჰოროდის რაიონში დაზიანდა და განადგურდა კერძო სახლები. საცხოვრებელ სახლსა და ავტოფარეხებში ხანძარი გაჩნდა.
ბუჩის რაიონში დაზიანდა სამი კერძო სახლი, 11 ავტომობილი და ორი საწყობი. ერთ-ერთ ობიექტზე ხანძარიც გაჩნდა.
ასევე, თავდასხმის შედეგად ინფრასტრუქტურის ობიექტებიც დაზიანდა ბუჩის, ვიშჰოროდისა და ობუხოვის რაიონებში.
ტიმურ ტკაჩენკოს განცხადებით, შემთხვევის ადგილებზე შესაბამისი სამსახურები მუშაობენ.
